भरतपुर, चितवन । स्टेप बाइ स्टेप इङ्लिस सेकेन्डरी स्कुलले विद्यार्थीहरूलाई मतदाता शिक्षा तथा निर्वाचन प्रणालीबारे व्यवहारिक ज्ञान दिने उद्देश्यले विद्यालय सभा निर्वाचन २०८३ सम्पन्न गरेको छ।
विद्यालयको वार्षिक शैक्षिक क्यालेन्डरअनुसार जेठ ८ गते शुक्रबार आयोजित निर्वाचनमा कक्षा २ देखि १० सम्मका करिब १२०० विद्यार्थी सहभागी भएका थिए। निर्वाचन दुई चरणमा सम्पन्न गरिएको थियो, जसअन्तर्गत पहिलो चरणमा कक्षा मनिटर तथा दोस्रो चरणमा हाउस क्याप्टेन र भाइस क्याप्टेन चयन गरिएको थियो।
निर्वाचनको प्रमुख निर्वाचन आयुक्त विद्यालयका अतिरिक्त क्रियाकलाप प्रमुख श्री कृष्णप्रसाद पोखरेल रहनुभएको थियो। निर्वाचन प्रक्रियामा शिक्षक, स्काउट विद्यार्थी तथा कक्षा ११ का शिक्षकहरूले मतदान अधिकृत, सुरक्षाकर्मी र पर्यवेक्षकको भूमिका निर्वाह गरेका थिए।
निर्वाचनबाट विभिन्न कक्षाका छात्र–छात्रा मनिटर तथा रेड, ग्रिन, ब्लु र एल्लो हाउसका क्याप्टेन र भाइस क्याप्टेन निर्वाचित भएका छन्। निर्वाचित विद्यार्थीहरूलाई प्रमाणपत्रसमेत वितरण गरिएको थियो।
कार्यक्रममा विद्यालयका प्राचार्य श्री कृष्णप्रसाद भट्टले व्यवहारिक सिकाइका लागि यस्ता कार्यक्रम प्रभावकारी भएको बताउँदै आगामी दिनमा पनि यस्ता गतिविधिलाई निरन्तरता दिइने जानकारी दिनुभयो।
