काठमाडौँ । अखिल नेपाल ट्रेड युनियन महासङ्घ (अन्टुक) को राष्ट्रिय भेला आगामी २०८३ जेठ २९ र ३० गते रुपन्देहीको बुटवलमा आयोजना गरिएको छ ।
अध्यक्ष लोकराज भुसालद्वारा २०८२ चैत २० गते अबेर राति जारी गरिएको प्रेसविज्ञप्तिमा सो जानकारी दिइएको हो ।
चैत १९ गते बसेको केन्द्रीय समिति बैठकका निर्णय सार्वजनिक गरिएको भनिएको सो विज्ञप्तिमा सरकारसित लोकतन्त्रको मूल भावनाअनुसार काम गर्न अनुरोध गरिएको छ ।
त्यस्तै जेनजी परिवारलाई राहत र क्षतिपूर्ति दिनुपर्ने तथा कार्की आयोगको प्रतिवेदन कार्यान्वयन गर्ने नाममा कानुनी प्रक्रिया मिच्ने तरिकालाई अन्टुकले विरोध गरेको छ ।
जेनजी आन्दोलनको नाममा बन्द भएका उद्योगव्यवसाय सञ्चालन गर्न तथा निकालिएका मजदुरलाई बहाल गर्न पनि अन्ुटकले माग गरेको छ ।
आगामी वैशाख १८ गते को १३७ औँ मे दिवस देशैभरि भव्य रूपमा मनाउने बताइएको सो प्रेसविज्ञप्तिको सङ्क्षिप्त पाठ यस्तो छ :
अखिल नेपाल ट्रेड युनियन महासङ्घ (अन्टुक) केन्द्रीय समितिको बैठक अध्यक्ष लोकराज भुसालको अध्यक्षता तथा सल्लाहकार भैरव रेग्मकिो विशेष उपस्थितिमा २०८२ चैत १९ गते बुटबलमा बस्यो । बैठकले मजदुर वर्गको दैनिक जीवनमा समसामयिक राजनैतिक परिस्थितिले पारेको असरको बारेमा यो प्रेसविज्ञप्ती जारी गरिएको छ ।
१. २०८२ फागुन २१ गते प्रतिनिधिसभा चुनावबाट निर्वाचित सरकारले लोकतन्त्रको मूल भावनालाई आत्मसात गरी काम गर्न हाम्रो सङ्गठन ध्यान आकर्षण गराउँछ । यस सन्दर्भमा गौरीबहादुर कार्की आयोगले एकपक्षीय प्रतिवेदनको आधारमा कानुन र विधिप्रक्रिया मिच्ने तरिका गलत छ । हामीले भदौ २३ र २४ दुवै दिनको घटनाका वास्तविक दोषीलाई कानुनी कारबाहीको दायरामा ल्याउन माग गर्दछौँ । त्यस्तै त्यति बेला मृत्युवरण गरेकाको परिवारलाई क्षतिपूर्ति र रोजगारीको व्यवस्था गर्न माग गर्दछौँ ।
२. जेनजी आन्दोलनका कारण बन्द हुन पुगेका व्यावसायिक तथा व्यापारिक केन्द्रको सञ्चालन, आन्दोलनको प्रभाव र कारण देखाएर निकालिएका मजदुरको पुन: बहाली, निजी अस्पतालमा चलिरहेको आन्दोलनको सम्बोधन गर्न सरकारसित माग गर्दछौँ ।
३. ट्रेड युनियन अधिकारबाट वञ्चित गराउने सरकारको नीतिप्रति हाम्रो ध्यानाकर्षण भएको छ । त्यसको विरुद्ध एकल र संयुक्त आन्दोलन सञ्चालन गरिनेछ । त्यसका लागि सम्पूर्ण मजदुर साथीहरूलाई तयार रहन आग्रह गर्दछौँ ।
४. महासङ्घको साङ्गठनिक सुदृढीकरणका लागि वार्षिक कार्ययोजना पारित गरिएको छ । त्यस क्रममा आगामी २०८३ जेठ २९–३० गते बुटबलमा महासङ्घको राष्ट्रिय भेला गर्ने निर्णय भएको छ ।
५. नोभेम्बर २०–२४, २०२५ मा भारतको पुनेमा सम्पन्न तेस्रो अन्तर्राष्ट्रिय अटोमोबाइल श्रमिक सम्मेलनमा महासङ्घको तर्फबाट अध्यक्ष लोकराज भुसाल, महासचिव धनपति सापकोटा, कमला बन्जाडे र भारतबाट ठाकुर खनाल सहभागी हुनुहुन्थ्यो । सम्मेलनबाट आगामी ३ वर्षका लागि अन्तर्राष्ट्रिय समन्वय समितिमा अध्यक्ष लोकराज भुसाल निर्वाचित हुनुभएको छ । सम्मेलनले २५ बुँदे पुने घोषणापत्र पनि जारी गरेको छ ।
६. १३७ औँ अन्तर्राष्ट्रिय मेदिवस २०८३ वैशाख १८ गतेका दिन अन्टुकको आयोजनामा देशैभरि भव्य रूपले मनाउने निर्णय भएको छ ।
