टेकराज भुसाल, सन्धिखर्क ।
अर्घाखाँचीको भूमिकास्थान नगरपालिकाका नगरप्रमुख झबिलाल थापाले नागरिकका लागि शिक्षा र स्वास्थ्य सेवा नि:शुल्क हुन सके मात्र मुलुकको वास्तविक परिवर्तन सम्भव हुने बताउनुभएको छ ।
२०८२ पुस ५ गते शनिबार भूमिकास्थान नगरपालिका–३ मा अवस्थित अन्नपूर्ण माध्यमिक विद्यालयको त्रिचलिसौँ वार्षिकोत्सव समारोहलाई सम्बोधन गर्दै नगरप्रमुख थापाले यस्तो धारणा व्यक्त गर्नुभएको हो ।
नगरप्रमुख थापाले भूमिकास्थान नगरपालिकाले शिक्षा क्षेत्रमा उल्लेख्य लगानी गरे पनि अपेक्षित प्रतिफल आउन नसकेको स्वीकार गर्दै शिक्षाको गुणस्तर सुधारका लागि शिक्षक, अभिभावक, विद्यार्थी र स्थानीय सरकारसहित सबै पक्ष सक्रिय हुनुपर्नेमा जोड दिनुभयो ।
देश नै क्रमश: विद्यार्थीविहीन अवस्थामा पुग्न लागेको भन्दै उहाँले यसप्रति गम्भीर चिन्तासमेत व्यक्त गर्नुभयो ।
यता अन्नपूर्ण माविले गत शैक्षिक सत्रको एसइई परीक्षामा शत्प्रतिशत नतिजा हासिल गर्न सफल हुनु उपलब्धिमूलक रहेको उल्लेख गर्दै नगरप्रमुख थापाले यस सफलतालाई निरन्तरतामा रूपान्तरण गर्नुपर्ने आवश्यकता औँल्याउनुभयो ।
‘पढ्दै, कमाउँदै, रमाउँदै’ अवधारणालाई अघि सार्दै नगरपालिकाले भूगोलअनुसार तरकारी खेती, फलफूल खेती, माहुरी पालनलगायतका वयवहारिक र आयमूलक शैक्षिक क्रियाकलाप विभिन्न विद्यालयमा सञ्चालनमा ल्याएको जानकारी पनि उहाँले दिनुभयो ।
कार्यक्रममा नगर उपप्रमुख बालकृष्ण बन्जाडे, वडाअध्यक्ष कृष्णप्रसाद बन्जाडे, शिक्षा शाखा प्रमुख तुवलाल सापकोटा तथा सामाजिक व्यक्तित्व सागर केसीलगायतले शिक्षा सुधार र सामुदायिक विद्यालयको सुदृढीकरणबारे आआफ्ना धारणा राख्नुभएको थियो ।
कार्यक्रमका अध्यक्ष तथा विद्यालय व्यवस्थापन समिति अध्यक्ष नारायणप्रसाद भुसालले विद्यालय स्थापनादेखि हालसम्मको यात्रा, उपलब्धि र चुनौतीबारे प्रकाश पार्दै सबै सरोकारवालाको निरन्तर सहयोगकै कारण विद्यालय आजको अवस्थामा आइपुगेको बताउनुभयो ।
शिक्षक सुशील खनालको सञ्चालनमा सम्पन्न कार्यक्रममा विद्यालयका प्रधानाध्यापक सुवासचन्द्र बन्जाडेले वार्षिक प्रगति प्रतिवेदन तथा आयव्यय विवरण प्रस्तुत गर्नुभएको थियो ।
