मस्को । रुसी राष्ट्रपति भ्लादिमिर पुटिनले आइतबार किएभ र युरोपेली नेताहरूले सोमबारदेखि बिनाशर्त ३० दिने युद्धविरामको आह्वान गरेको केही घण्टापछि मे १५ (जेठ १ गते) मा इस्तानबुलमा युक्रेनसँग प्रत्यक्ष वार्ता गर्ने प्रस्ताव राख्नुभएको छ ।
युक्रेन, बेलायत, फ्रान्स, जर्मनी र पोल्यान्डका नेताहरूले शनिबार किएभमा रुस प्रस्तावमा सहमत नभए मस्कोमाथि नयाँ प्रतिबन्ध लगाउने र युक्रेनलाई सैन्य समर्थन दिने धम्की दिएका थिए ।
क्रेमलिनमा १ (शनिबार २३०० जिएमटी) बजेपछिको आफ्नो बयानमा पुटिनले त्यो आह्वानलाई स्पष्ट रूपमा सम्बोधन गर्नुभएन बरु यसको सट्टा ताजा रुसयुक्रेन वार्ताका लागि प्रतिप्रस्ताव प्रस्तुत गर्नुभयो ।
‘हामी किएभ अधिकारीलाई सन् २०२२ मा टुटेको वार्ता पुनः सुरु गर्न प्रस्ताव गर्दछौँ र त्यस्तो वार्ता कुनै पनि पूर्व शर्तबिना होस् भन्ने म जोड दिन्छु’ पुटिनले भन्नुभयो ।
रुसी र युक्रेनी वार्ताकारले द्वन्द्वको पहिलो हप्तामा इस्तानबुलमा प्रत्यक्ष वार्ता गरेका थिए तर लडाइँ रोक्न सहमत हुन सकेनन् । त्यसपछि द्वन्द्व निरन्तर जारी छ ।
‘हामी इस्तानबुलमा बिहीबार मे १५ मा ढिलाइ नगरी (वार्ता) सुरु गर्ने प्रस्ताव गर्दछौँ’ पुटिनले भन्नुभयो ।
उहाँले वार्तालाई सहज बनाउन सहयोग माग्न टर्कीका राष्ट्रपति रेसेप तैयप एर्दोगानसँग चाँडै कुरा गर्ने बताउनुभयो ।
उहाँले ‘युक्रेनसँग गम्भीर वार्तामा प्रतिबद्ध रहेको र ‘द्वन्द्वका मूल कारण हटाउन र दीर्घकालीन शान्ति स्थापना गर्न’ वार्ता चाहेको बताउनुभयो ।
रुसको ‘द्वन्द्वका मूल कारण’ सम्बन्धी सन्दर्भले सामान्यतया किएभ र पश्चिमसँगका कथित गुनासालाई जनाउँछ, जुन मस्कोले सन् २०२२ फेब्रुअरीमा आक्रमण सुरु गर्न औचित्यका रूपमा प्रस्तुत गरेको छ ।
यसमा युक्रेनलाई ॅडिनाजिफाई’ गर्ने, देशको पूर्वमा रुसी भाषीको रक्षा गर्ने, नाटो विस्तारको विरुद्धमा पछाडि धकेल्ने र युक्रेनको पश्चिमतर्फको भूराजनीतिक बहाव रोक्ने प्रतिज्ञा समावेश छन् । (रासस/एएफपी)
