नयाँदिल्ली । कस्मिरको पहलगाममा भएको आतङ्कवादी घटना भारत–पाकिस्तान युद्धमा परिणत भएको छ ।
भारतले ‘अपरेसन सिन्दूर” नाम दिइएको एक सैन्य कारबाहीअन्तर्गत मे ७, २०२५ का दिन पाकिस्तानका नौ स्थानमा हवाई आक्रमण गरेपछि यो स्थिति निर्माण भएको हो ।
भारतीय रक्षा मन्त्रालयका अनुसार ती सबै स्थानबाट भारतमाथि हुने आतङ्की आक्रमणको योजना र निर्देशन भइरहेको थियो ।
यो कारबाही अप्रिल २२ मा भारत–नियन्त्रित कश्मीरमा भएको आक्रमणपछि गरिएको हो, जसमा २६ जना पर्यटकको मृत्यु भएको थियो । भारतले उक्त आक्रमणको दोष पाकिस्तानमाथि लगाएको छ ।
भारतको वासिङ्टनस्थित दूताबासले जारी गरेको विज्ञप्तिमा भनिएको छ– “आक्रमण पूर्ण रूपमा लक्षित र सटिक थियो । केवल चिनिएका आतङ्की शिविरलाई मात्र निसाना बनाइएको हो ।”
दूतावासले यस्तो दाबी गरेपछि पाकिस्तानमा करिब तीन दर्जन सर्वसाधारणको मृत्यु भइसकेको बताइएको छ ।
भारतीय अनलाइन द भाष्करका अनुसार भारतले मुजफ्फरावाद, बाघ, गुलपुर, कोटली, भीमबेर, सियालकोट, मुरिदके, चक अमरू र बहावलपुरमा एयरस्ट्राइक गर्दा ३० जनाको मृत्यु भएको हो ।
सो आक्रमणमा तीन जना भारतीयको पनि मृत्यु भएको बताइएको छ ।
पाकिस्तानी सेनाको आक्रमणमा परी तीन भारतीय नागरिकको मृत्यु भएको भारतीय सेनाले जानकारी दिएको छ ।
यता, पाकिस्तानी प्रधानमन्त्री शहबाज शरिफले भारतको कारबाहीलाई युद्धको घोर उक्साहट भन्दै कडा निन्दा गर्नुभयो र बलियो जवाफ दिने चेतावनी दिनुभएको छ ।
त्यस्तै, संयुक्त राष्ट्र सङ्घले दुबै पक्षलाई संयम अपनाउन आग्रह गरेको छ ।
उसले भनेको छ– “दुई आणविक शक्तिबिच युद्ध विश्वका लागि अत्यन्त खतरनाक हुन सक्छ ।’
यता, पाकिस्तानको पन्जाब प्रदेशमा विद्यालय बन्द गरिएका छन् । उक्त प्रदेशकी मुख्यमन्त्री मरियम नवाज शरीफले जनसुरक्षाको दृष्टिले प्रान्तभरका शिक्षण संस्था बन्द गरिने घोषणा गरेकी हुन् । (रासस/एएनआई/एएफपी)
