ढाका । बङ्गलादेशको अन्तरिम सरकारले अपदस्थ प्रधानमन्त्री शेख हसिनाको राजनीतिक दलमाथि प्रतिबन्ध लगाउने आफ्नो कुनै योजना नरहेको बताएको छ ।
नोबेल पुरस्कार विजेता तथा बङ्गलादेशको कामचलाउ सरकारका प्रमुख मोहम्मद युनुसले भने आफूले कुनै दलमाथि प्रतिबन्ध लगाउने कुनै मनसाय नराखेको बताउनुभयो ।
“युनुसले पार्टीमाथि प्रतिबन्ध लगाउने कुनै योजना अन्तरिम सरकारको रहेको छैन” उहाँको सचिवालयद्वारा जारी विज्ञप्तिमा भनिएको छ यद्यपि यसको नेतृत्वभित्रका व्यक्तिहरू जो हत्या र मानवता विरुद्धको अपराधमा आरोपित छन्, उनीहरूलाई बङ्गलादेशको अदालतमा मुद्दा चलाइनेछ ।”
सत्ताच्युत भएपछि छिमेकी मुलुक भारतमा शरण लिएकी हसिना र उहाँका सहयोगी विरुद्ध ढाकाको एक न्यायाधीकरणले यसअघि नै पक्राउ पुर्जी जारी गरिसकेको छ ।
संयुक्त राष्ट्र सङ्घको मानव अधिकार कार्यालयको तथ्य पत्ता लगाउने एक मिसनले गत महिना सत्तामा टिकिरहने प्रयासमा प्रदर्शनकारीमाथि सुनियोजित आक्रमण र हत्याका लागि उहाँको सरकार जिम्मेवार रहेको बताएको थियो ।
यसले हत्या, यातना, कैद र अन्य अमानवीय कार्य गर्ने जस्ता मानवता विरोधी अपराध भएका छन् भनेर विश्वास गर्ने उचित आधार फेला पारेको थियो ।
पूर्वप्रधानमन्त्री हसिनालाई पदच्यूत गरिएदेखि नै विद्यार्थीहरूले नयाँ सरकारका लागि चुनावअघि पार्टीमाथि प्रतिबन्ध लगाउन माग गर्दै आएका छन् ।
अन्तरिम सरकारले गत वर्षको प्रदर्शनमा हिंसात्मक आक्रमणमा संलग्न भएको भन्दै गत अक्टोबरमा अवामी लिगको विद्यार्थी सङ्गठनमाथि प्रतिबन्ध लगाएको थियो तर पार्टी सङ्ठनमाथि कुनै प्रतिबन्ध लगाइएको थिएन ।
नयाँ विद्यार्थी समर्थित राजनीतिक दलका एक प्रमुख नेता हस्नत अब्दुल्लाहले सरकारको निर्णयको निन्दा गर्नुभएको छ ।
‘अवामी लिगमाथि प्रतिबन्ध लगाउनुपर्छ’ उहाँले फेसबुकमा लेख्नुभएको छ ।
विद्यार्थी नेता नासिर उद्दिन पटवारीले गत महिना पार्टीमाथि प्रतिबन्ध नलगाउँदा बङ्गलादेश गृहयुद्धतर्फ धकेलिने चेतावनी दिनुभएको थियो ।
बङ्गलादेशको प्रमुख इस्लामिक पार्टी जमातका नेता शफीकुल रहमानले पनि शुक्रबार सामाजिक सञ्जालमा लेख्नुभएको छ– ‘जनताले पार्टीको पुनर्स्थापना स्वीकार गर्ने छैनन् ।’ (रासस/एएफपी)
