काठमाडौँ । संयुक्त राज्य अमेरिकाले भेनेजुयलाका २३८ आप्रवासीलाई देश निकाला गरेको छ ।
एउटा आपराधिक गिरोहका सदस्य भएको आरोप लागेका उनीहरूलाई अदालतको आदेशका बाबजुद अमेरिकाबाट एल साल्भाडोरको सुपरम्याक्स बन्दीगृह पठाइएको बीबीसीले जनाएको छ ।
एक अमेरिकी न्यायाधीशले उनीहरूलाई देशनिकाला गर्न रोक लगाउने आदेश दिएका थिए।
एल साल्भाडोरका राष्ट्रपति नायिब बुकेलेले सामाजिक सञ्जालमा लेख्दै भेनेजुएलाको गिरोह ‘ट्रेन डे आरग्व’ का २३८ जना सदस्य र एमएस–थर्टीन नामक अन्तर्राष्ट्रिय गिरोहका २३ जना आफ्नो देशमा आइतवार बिहान आइपुगेको जानकारी दिएका छन्।
अमेरिका र एल साल्भाडोर दुवै देशका अधिकारीहरूले बन्दीहरूको पहिचान खुलाएका छैनन्। उनीहरूले ती व्यक्तिहरू कस्ता अपराधमा थिए भन्नेबारे विस्तारमा केही भनेका छैनन्।
अमेरिकामा एक सङ्घीय न्यायाधीशले ट्रम्प प्रशासनलाई २०० वर्षभन्दा पुरानो युद्धकालीन कानुन देखाएर त्यसरी देशनिकाला गर्ने कदम रोक्न आदेश दिएका थिए। तर त्यस बेलासम्म ती व्यक्तिहरूलाई बोकेको विमान उडिसकेको थियो।
सामाजिक सञ्जालमा न्यायाधीशको आदेशलाई इङ्गित गर्दै बुकेलेले त्यो ढिला आएको प्रतिक्रिया दिएका छन्।
तस्बिर : बीबीसी
एल साल्भाडोरका राष्ट्रपति नायिब बुकेलेको पोस्ट गरेको एउटा भिडिओमा हातखुट्टा सिक्रीले बाँधिएका मानिसहरू लामबद्ध भएको र उनीहरूलाई विमानबाट सशस्त्र अधिकारीहरूले ल्याइरहेको देख्न सकिन्छ।
निकै कडा सुरक्षाघेरा भएको उक्त बन्दीगृहमा ४०,००० सम्म कैदी राख्न सकिन्छ। त्यहाँ बन्दीहरूसँग दुर्व्यवहार हुने गरेको मानवअधिकारवादी संस्थाहरूले बताउँदै आएका छन्।
अमेरिकी राष्ट्रपति डोनल्ड ट्रम्पले शनिवार सन् १७९८ ताकाको ‘एलिअन एनमिज एक्ट’ नामक कानुन सक्रिय बनाउँदै त्यसमा आफूले हस्ताक्षर गरेको घोषणा गरेका थिए। त्यस क्रममा उनले ट्रेन डे आरग्वलाई संयुक्त राज्य अमेरिकाको भूभागमाथि ‘शत्रुतापूर्वक अतिक्रमण गरेको, आक्रमण गर्ने प्रयास गरेका वा चेतावनी दिएको’ आरोप लगाएका थिए।
उनले उक्त गिरोहका सदस्यहरू अमेरिकाविरुद्ध ‘गैरपरम्परागत युद्ध’मा संलग्न रहेका हुनालेद उनीहरूलाई देशनिकाला गरिने बताएका थिए।
यसअघि दोस्रो विश्वयुद्धका बेला अमेरिकामा जापानी मूलका मानिसहरूलाई नियन्त्रणमा लिन उक्त कानुन प्रयोग गरिएको थियो।
