जेरुसेलम । सबै इजरायली बन्धकलाई तत्काल रिहा गर्ने अमेरिकी राष्ट्रपति डोनाल्ड ट्रम्पको चेतावनीले नाजुक गाजा युद्धविरामसँग सम्बन्धित विषयलाई थप जटिल बनाएको हमासका एक वरिष्ठ नेताले मङ्गलबार बताएका छन् ।
‘ट्रम्पले सम्झनुपर्छ कि त्यहाँ एउटा सम्झौता छ, जसलाई दुवै पक्षले सम्मान गर्नुपर्दछ र कैदी (बन्धक) फिर्ता गर्ने यो एक मात्र तरिका हो’ सामी अबु जुहरीले भन्नुभयो–’धम्कीको भाषाको कुनै मूल्य छैन र यसले मामिलालाई थप जटिल बनाउँछ ।’
जनवरी १९ देखि लागु गरिएको युद्धविरामले गाजामा १५ महिनाभन्दा बढी चलेको लडाइँलाई धेरै हदसम्म रोकेको थियो र इजरायली जेलबाट सयौँ प्यालेस्टिनी कैदीको सट्टामा पाँच समूहका इजरायली बन्धकको मुक्त भएका थिए तर गत महिना ट्रम्पले गाजा कब्जा गर्ने र त्यहाँका २० लाखभन्दा बढी बासिन्दालाई हटाउने प्रस्ताव गरेपछि तनाव बढेको थियो ।
शनिबार दिउँसोसम्म सबै इजरायली बन्धकलाई मुक्त नगरे युद्धविरामको अन्त्यका लागि आह्वान गर्ने भन्दै उहाँले सोमबार थप दबाब दिनुभएको थियो ।
‘मेरो विचारमा यदि सबै बन्धक शनिबार १२ बजेसम्म, मलाई लाग्छ, यो उपयुक्त समय हो, फिर्ता गरिएनन् भने म भन्छु, यसलाई रद्द गर्नुपर्छ र सबै सर्त समाप्त हुन्छन् र नरक मच्चिन दिनुपर्छ’ ट्रम्पले ह्वाइट हाउसमा पत्रकारलाई भन्नुभयो ।
युद्धविराम सम्झौताअनुसार सम्झौताको चालु ४२ दिनको पहिलो चरणमा चरणबद्ध रूपमा रिहाइ हुनुपर्ने छ ।
इजरायलले सहायता वितरणलगायत युद्धविराम सम्झौताअन्तर्गत आफ्नो प्रतिबद्धता पूरा गर्न असफल भएको आरोप लगाउँदै हमासले अर्को बन्धकको रिहाइ अर्को सूचना नआउन्जेल स्थगित गरिने बताएपछि ट्रम्पको पछिल्लो चेतावनी आएको हो । (रासस/एएफपी)
