माधवभाट क्षेत्री, कपिलवस्तु
राष्ट्रिय जनमोर्चा कपिलवस्तुले जिल्ला प्रशासन कार्यालयमा १६ बुँदे ज्ञापन पत्र बुझाएको छ ।
कपिलवस्तुका जिल्ला अध्यक्ष रामप्रसाद बेल्वासेको नेतृत्वमा गएको प्रतिनिधि मण्डलले प्रमुख जिल्ला अधिकारी विश्वप्रकास अर्याल मार्फत् प्रधानमन्त्रीलाई ज्ञापन पत्र बुझाएका हो ।
कपिलवस्तुको बाणगङ्गा ७ मोतिपुरबाट वडा नं. ६, कपिलवस्तु नगरपालिका वडा नं ९ हँुदै विस्तार गर्न थालिएको ३३ के.भि प्रसारण लाईन विस्तारमा स्थानीयसँग समन्वय गरि जनताको चल अचल सम्पतीको कम क्षती हुने गरि विस्तार गर्न लगायतका १६ बुँदे मागसहित थियो ।
उक्त ज्ञापनपत्रले विभिन्न राजनीतिक र सार्वजनिक समस्याहरूमा सरकारको ध्यानाकर्षण गराउँदै समस्या समाधानका लागि ठोस कदम चाल्नको लागि आग्रह पनि गरेको छ ।
ज्ञापनपत्रका मुख्य बुँदा यस प्रकार छन :
गणतन्त्रको सुरक्षाः मुलुकमा गणतन्त्रमाथि भइरहेका प्रतिगामी हमलालाई रोक्न र सरकारलाई असन्तोषलाई प्रतिगामी दिशामा मोड्ने प्रयासबाट बच्न सचेत गराउन जोड दिइएको छ ।
राष्ट्रियता र भूपरिवर्तनः भारतीय सेनाको कालापानीमाथि तैनाती र अन्य भूमि अतिक्रमणका मुद्दा समाधान गर्न, भारतीय सेनाको फिर्ती र नेपाली भूमिको पुनः प्राप्तिको माग गरिएको छ ।
साम्राज्यवाद विरोधः अमेरिकी साम्राज्यवाद र एमसीसी सम्झौतासँग सम्बन्धित मुद्दामा सरकारलाई कडा कदम चाल्न र सम्झौतासँग सम्बन्धित प्रस्ताव खारेज गर्न अनुरोध गरिएको छ ।
असमान सन्धिहरूको खारेजीः सन् १९५० का असमान सन्धि र सम्झौताहरूको खारेजी र नेपालको प्राकृतिक स्रोतको संरक्षण गर्न आग्रह गरिएको छ ।
लिपुलेक सम्झौतासम्बन्धी विवादः चीन र भारत बिचको लिपुलेक नाका सम्झौताका विरुद्ध खारेजीको माग गरिएको छ ।
असङ्लग्न परराष्ट्र नीतिः नेपालको असङ्लग्न परराष्ट्र नीतिको रक्षा गर्दै विगतका गलत कामकारबाहीहरूलाई सुधार्न आग्रह गरिएको छ ।
सङ्घीयता र व्यय भारः सङ्घीयताका कारण अनावश्यक व्यय भारको बृद्धि भएको भन्दै, सङ्घीयता खारेज गर्न र जातिवाद तथा क्षेत्रीयतावादको प्रवृत्तिका विरुद्ध दृढतापूर्वक उभिन सरकारलाई भनिएको छ ।
चाडपर्वका मूल्यवृद्धि र कालोबजारीः नेपाली चाडपर्वका अवसरमा कृत्रिम अभाव, मूल्यवृद्धि र कालोबजारीलाई रोक्न समयमै सतर्कता अपनाउन माग गरिएको छ ।
सहकारी क्षेत्र सुधारः सहकारी क्षेत्रमा देखिएका समस्याहरूको समाधान गर्दै, बचतकर्ताको रकमको सुरक्षा गर्न कडा कारबाही र नयाँ कानुनको निर्माण गर्न आग्रह गरिएको छ।
भ्रष्टाचार र कानूनः भ्रष्टाचार नियन्त्रणका लागि नयाँ कानुन बनाउने र भ्रष्टाचारीहरू विरुद्ध हदम्याद बिना मुद्दा दायर गर्न सन्देश दिइएको छ।
स्वीस बैंकको कालो धनः स्वीस बैंकमा जम्मा गरिएको नेपाली कालो धन नेपालमा फिर्ता ल्याउने माग गरिएको छ।
पर्यावरण संरक्षणः अन्तर्राष्ट्रिय मञ्चमा नेपालको पर्यावरण संरक्षण र जलवायु समस्याको मुद्दा उठाउन, र हरित ग्यासका कारण भएका समस्याको क्षतिपूर्ति ठुला औधोगिक राष्ट्रहरूले दिनुपर्ने कुरा उल्लेख गरिएको छ।
सङ्क्रमणकालीन न्यायः यौनहिंसा, उत्पीडन र बलात्कारका घटनामा परेका महिलाहरूलाई भयरहित उजुरीको वातावरण र निष्पक्ष छानबिनको लागि सरकारलाई आग्रह गरिएको छ।
यातायात सुरक्षाः सडक विस्तार र पुराना गाडीहरूको सञ्चालनमा रोक लगाएर यातायात दुर्घटनालाई न्यूनिकरण गर्न भनिएको छ।
कपिलवस्तु स्थानीय समस्याहरूः कपिलवस्तुमा बाणगंगाको मोतिपुर देखि तौलिहवा लैजानको लागि ३३ के.भी. प्रसारण लाइन विस्तार गर्दा प्रहरी प्रशासन लगाई वल प्रयोग गर्न खोजिएको हुदाँ सो क्षेत्रमा जनताको तिब्र विरोध रहेको र स्थानीयहरुसंग समन्वय समेत नभएको हुदाँ समन्वय र वैकल्पीक उपाय खोजी समस्या समाधान गर्नुका साथै अन्य स्थानीय समस्याहरूको समाधानका लागि स्थानीय समन्वय र वैकल्पिक उपाय अपनाउन जोड दिइएको छ ।
ज्ञापनपत्र बुझाउने प्रतिनिधि मण्डलमा राष्ट्रिय जनमोर्चाका जिल्ला अध्यक्ष राम प्रसाद बेल्वासे, जिल्ला सल्लाहकार दधिराम आचार्य, जिल्ला सचिव केयरसिंह अदै, नेकपा मसालका जिल्ला प्रवक्ता माधव भाटक्षेत्री, बामपन्थी नेता शिव पौडेललगायत रहेका छन् ।
उक्त ज्ञापनपत्रमा उठाइएका मुद्दाहरूको समाधान गर्न सरकारको गम्भीर ध्यानाकर्षण गरिएको छ ।
