काठमाडौं । राष्ट्रिय जनमोर्चाका अध्यक्ष चित्रबहादुर केसीले नेकपा (एकीकृत समाजवादी) को दशौँ राष्ट्रिय महाधिवेशनलाई शुभकामना दिनुभएको छ ।

आइतबारदेखि काठमाडौंमा सुरु भएको महाधिवशेनको उद्घाटन सत्रमा शुभकामना दिँदै केसीले लोकतन्त्र, अप्ठ्यारोमा परेको बेला एकीकृत समाजवादीको उत्पत्ति भएको बताउनुभयो ।

‘यो पार्टी विशेष परिस्थितमा, लोकतन्त्र, गणतन्त्र अप्ठ्यारोमा परेका बेला यो उत्पत्ति भएको हो’ केसीले भन्नुभयो, ‘हाम्राबीचमा कैयौं मतभदहरू होलान्, तैपनि हामीले के बुझ्नुपर्छ भने अहिलेको संविधान, अहिलेको लोकतन्त्र, अहिलेको गणतन्त्र यिनै अहिले भएका पार्टीको योगदानबाट, त्याग तपस्याबाट आएको हो। यो कुरा त कसैले पनि होइन भन्न सक्दैन ।’

उहाँले देशको आर्थिक समस्या, राजनीतिक समस्या, सामाजिक समस्या जसरी हल गर्नुपर्ने हो त्यो हुन नसकेको बताउनुभयो ।

केसीले भन्नुभयो, ‘तर यसलाई जसरी लैजानुपर्ने हो देशको आर्थिक समस्या, राजनीतिक समस्या, सामाजिक समस्या जसरी हल गर्नुपर्ने हो हामीले त्यसमा सकिराखेका छैनौँ । यो समस्या हो, हाम्रो कमजोरी हो ।’

उहाँले लोकतन्त्रका लागि लडेका शक्तिहरु लोकतन्त्र र राष्ट्रियताको रक्षाका लागि फेरी एकजुट हुनुपर्ने बताउनुभयो ।

केसीले भन्नुभयो, ‘यो लोकतन्त्र, गणतन्त्र ल्याउनलाई हामी जसरी एकढिक्का भएर लड्यौँ र यसलाई स्थापित गर्यौँ, अब यसको रक्षाको लागि पनि देशको राष्ट्रियता, सार्वभौमिकता र अखण्डताको रक्षाको लागि राष्ट्रियताको लागि हामी सबै एक ठाउँ हुनुपर्छ ।’

पाँच दिनसम्म चल्ने महाधिवेशनबाट दुई सय ९९ सदस्यीय कार्यसमिति तथा २१ पदाधिकारी चयन गरिने एकीकृत समाजवादीले जनाएको छ ।

महाधिवेशनलाई प्रधानमन्त्री पुष्पकमल दाहाल ‘प्रचण्ड’, नेपाली कांग्रेसका सभापति शेरबहादुर देउवा, राष्ट्रिय स्वतन्त्र पार्टीका सभापति एवं उपप्रधानमन्त्री तथा गृहमन्त्री रवि लामिछाने, जनता समाजवादी पार्टीका अध्यक्ष अशोक राई, जसपा नेपालका अध्यक्ष उपेन्द्र यादव, जनमत पार्टीका अध्यक्ष सिके राउत, समाजवादी मोर्चाका संयोजक नेत्रविक्रम चन्द, लोकतान्त्रिक समाजवादी पार्टीका नेता सर्वेन्द्रनाथ शुक्लालगायत नेताहरूले शुभकामना दिनुभएको थियो ।

पार्टी अध्यक्ष माधवकुमार नेपाल, सम्मानित नेता झलनाथ खनाल, महासचिव घनश्याम भुसाललगायत नेताहरूले उद्घाटन सत्रलाई सम्बोधन गर्नुभएको थियो ।