टेकराज भुसाल, नुवाकोट (अर्घाखाँची) ।
एक्काइसौँ राष्ट्रिय धान दिवस (असार १५) अर्घाखाँचीको भूमिकास्थान नगरपालिकामा पनि मनाइएको छ । भूमिकास्थान नगरपालिका कृषि शाखाको आयोजनामा वडा नं. २ ढाकाबाङको खाकावेशीमा धान रोपेर राष्ट्रिय धान दिवस मनाइएको हो ।
“जलवायु मैत्री कृषि : धान उत्पादनमा वृद्धि” भन्ने नाराका साथ एक्काइसौँ राष्ट्रिय धान दिवस मनाइएको भूमिकास्थान नगरपालिका कृषि शाखाले जनाएको छ ।
नगरप्रमुख झविलाल थापा, प्रमुख प्रशासकीय अधिकृत जगदीशचन्द्र नेपाली, भूमिकास्थान–२ का वडाध्यक्ष बुद्धिबहादुर थापा, ३ नं. वडाका वडाध्यक्ष कृष्णप्रसाद बन्जाडे, कार्यपालिका सदस्य, वडासदस्य, सञ्चारकर्मी, विभिन्न कृषि सहकारी संस्थाका अध्यक्ष र कृषकको उपस्थितिमा धानरोपाइ गरिएको थियो ।
सो अवसरमा नगरप्रमुख थापाले नगरवासीको मुख्य आम्दानीको स्रोत धान नै रहेकाले यसको उत्पादन बढाउन र यहाँका किसानको संरक्षण गर्ने मुख्य दायित्व स्थानीय तहको काँधमा रहेको बताउँदै कृषि क्षेत्रलाई प्राथमिकतामा राखेर आगामी आर्थिक वर्षको नीति, कार्यक्रम तथा बजेट ल्याइएको बताउनुभयो ।
‘हामी बाँच्नका लागि धानको सहारा लिन्छौँ’ नगरप्रमुख थापाले भन्नुभयो– ‘तर धान उत्पादन गर्ने किसानलाई बचाउने प्रयास गर्दैनौँ ।’ अब किसानलाई बचाउने कार्यतर्फ नगरपालिका सदैव तत्पर रहन्छ ।
सोही अवसरमा सहभागी र अतिथिलाई दहीचिउरासमेत भोजन गराइएको नगरपालिका कृषि विकास शाखा प्रमुख रामबहादुर थापाले जानकारी दिनुभयो ।
नेपाल कृषिप्रधान देश भएको र यहाँका अधिकांश मानिस कृषिपेसामा निर्भर रहेकाले बर्सेनि धानदिवस मनाउने गरिएको छ । २०६१ मङ्सिर २९ गते मन्त्रिपरिषदले निर्णय गरी २०६२ असार १५ गतेदेखि राष्ट्रिय धान दिवस मनाउन थालिएको हो ।
