खलङ्गा । प्रगतिशील पत्रकार सङ्घ प्युठानले नेपाल पत्रकार महासङ्घको जिल्ला कार्यालयमा ताल्चा लगाएको छ ।
महासङ्घको सदस्यता शुद्धीकरणमा प्रगतिशीलका क्रियाशील पत्रकारलाई विभेद गरेको भन्दै ताल्चा लगाइएको हो ।
प्रगतिशील प्युठानका अध्यक्ष प्रज्ज्वल पहाडी र सचिव लोकेन्द्र सुनारको हस्ताक्षरमा जारी प्रेसविज्ञप्ति जारी गर्दै २०८१ असार १५ गते खलङ्गास्थित महासङ्घको जिल्ला कार्यालयमा ताल्चा लगाएको अध्यक्ष पहाडीले बताउनुभयो ।
महासङ्घको प्युठान जिल्ला समिति र प्रदेश समितिले पठाएको शुद्धीकरण नामावली काटेको प्रसङ्ग उठाउँदै विज्ञप्तिमा भनिएको छ– “शाखा र प्रदेशले सिफारिस गरेका व्यक्तिहरूको समेत महासङ्घ केन्द्रले मनोमानी ढङ्गले सदस्यता खारेज गरेकोप्रति असहमति जनाउँदै खेद प्रकट गर्दछौँ ।”
शुद्धीकरणको सवालमा भएका भेदभाव तत्कालै सच्चाउन विज्ञप्तिमा माग गरिएको छ ।
विज्ञप्तिमा अगाडि भनिएको छ– “महासङ्घको यस खालको विभेदकारी निर्णय नसच्चिँदासम्म आजैका मितिदेखि नेपाल पत्रकार महासङ्घ जिल्ला शाखा प्युठानको कार्यालयमा तालबन्दी गरिने व्यहोरासमेत यसै विज्ञप्तिमार्फत जानकारी गराउँछौँ ।”
