गोपालप्रसाद भट्टराई, नुवाकोट ।
अर्घाखाँचीको भूमिकास्थान नगरपालिकाले आउँदो आर्थिक वर्ष २०८१/०८२ का लागि ८६ करोड ८८ लाख ४७ हजार रुपैयाँको बजेट पेस गरेको छ ।
२०८१ असार १० गते सोमबार सम्पन्न नगरसभा तथा पन्ध्रौँ अधिवेशनमा नगर उपप्रमुख बालकृष्ण बन्जाडेले बजेट पेस गर्नुभएको हो ।
यो बजेट चालु आर्थिक वर्षको भन्दा ३० लाख ११ हजार रुपैयाँले बढी हो । चालु आर्थिक वर्षमा भूमिकास्थानले ८६ करोड ५८ लाख ३६ हजार बराबरको बजेट खर्च गरिरहेको छ । नगरउपप्रमुख बन्जाडेले प्रस्तुत गरेको आगामी आर्थिक वर्षको कुल बजेटमध्ये ५७ करोड १० लाख ६२ हजार अर्थात ६५.७३ प्रतिशत चालुतर्फ विनियोजन गरिएको छ भने २९ करोड ७७ लाख ८५ हजार अर्थात ३४.२७ प्रतिशत रकम पुँजीगततर्फ छुट्याइएको छ ।
कुल बजेटमा ७० लाख रुपैयाँ आन्तरिक आय हुने अनुमान छ । प्रस्तुत बजेटमा सङ्घीय वित्तीय समानीकरण अनुदान ११ करोड ०२ लाख, सङ्घस्य सःशर्त अनुदान ३५ करोड ५२ लाख ६५ हजार, सङ्घीय राजस्व बाँडफाँड ११ करोड १० लाख ११ हजार, सङ्घीय सरकार विशेष अनुदान पुँजीगत ५५ लाख, सङ्घीय सरकार समपूरक अनुदान पुँजीगत १ करोड, सङ्घीय सरकार रोयल्टी २७ लाख ८८ हजार प्राप्त हुने प्रक्षेपण गरिएको छ ।
त्यस्तै, प्रदेश सरकार वित्तीय समानीकरण अनुदान ७४ लाख ८२ हजार, प्रदेश सरकार समपूरक अनुदान १ करोड ५ लाख, प्रदेश नवप्रवर्द्धन म्याचिङ १ करोड, प्रदेश सशर्त अनुदान १ करोड १० लाख र प्रदेश राजस्व बाँडफाँडतर्फ १ करोड ४० लाख रहने आँकलन गरिएको छ ।
आगामी आर्थिक वर्षमा तलब भत्ता तथा कार्यालय सञ्चालनका लागि भूमिकास्थानले १० करोड ६९ लाख ८१ हजार विनियोजन गरेको छ भने जेष्ठ नागरिक दीर्घसेवा सम्मान तथा सामाजिक सुरक्षा कर्यक्रमको लागि १८ करोड ५० लाख विनियोजन भएको छ ।
भूमिकास्थानले जेष्ठ नागरिक दीर्घसेवा सम्मान तथा सामाजिक सुरक्षा कार्यक्रमबाहेकको कुल विनियोजित बजेट ६८ करोड ७४ लाख ३८ हजारमध्ये आर्थिक विकास तर्फ ३२ करोड ८९ लाख ९४ हजार अर्थात ५ प्रतिशत, सामाजिक विकास तर्फ ३९ करोड ७९ हजार ३१ हजार अर्थात ५८ प्रतिशत, पूर्वाधार विकास तर्फ १३ करोड ९१ लाख अर्थात २० प्रतिशत, वन वातावरण तर्फ ४० लाख र सुशासन तथा संस्थागत विकास क्षेत्रमा १० करोड ९९ लाख ४९ हजार अर्थात १६ प्रतिशत बजेट विनियोजन गरेको छ ।
भूमिकास्थान नगरपालिकाले आगामी आर्थिक वर्षमा रोजगारी, स्वरोजगार र उत्पादनलाई पहिलो प्राथमिकतामा राख्ने नीति लिएको नगर प्रमुख झविलाल थापाले बताउनुभयो । जस अनुसार नवप्रवर्द्धनात्मक कार्यक्रमअन्तर्गत कर्मशील जनशक्ति परिचालन गर्ने, बाँझो जग्गामा व्यवसायीक खेती गर्न सूचीकृत बेरोजगारलाई काममा लगाउने, आगामी आर्थिक बर्षमा ५ सय व्यक्तिलाई स्वरोजगार बनाउने गरी हस्तकलाका सामग्री उत्पादन र बजारीकरणमा संलग्न गराउने नगरपालिकाले निति तथा कार्यक्रम बनाएको नगर प्रमुख थापाको भनाइ छ ।
भूमिकास्थानले नगरस्तरिय मुख्य सडकको अतिरिक्त वडा स्तरका १० ओटा सडकमा समेत कालोपत्रेको कार्य प्रारम्भ गर्ने गरि बजेटको व्यवस्था गरेको छ ।
त्यस्तै, आगलागी बाट हुने जोखिम न्यूनिकरणको लागि नगरपालिकाले सामूदायिक वनसँगको समन्वयमा वस्तिको नजिक रहेका पातपतिङ्गर तथा झाडी सङ्कलन गरी कम्पोस्ट मल बनाउने नीति लिएको छ ।
नगरपालिकाले पूर्वाधार, भू उपयोग र अधुरा योजनाहरूको निरन्तरता दिने, कृषि तथा पशुविकास कार्यक्रम, शिक्षा विकास, नियमित सडक मर्मत/सम्भार, स्वास्थ्य सेवा, वातावरण, सरसफाइ एवम् हरियाली निर्माण सूचना प्रविधि तथा डिजिटल प्रणालीको उपयोग, सहकारी तथा रोजगार प्रर्वद्धन, पर्यटन तथा उद्योग र वाणिज्य प्रवर्द्धन तथा युवा तथा खेलकुद विकासलाई प्राथमिकतामा राखेको प्रमुख प्रशासकिय अधिकृत जग्दिशचन्द्र नेपालीले जानकारी दिनुभएको छ ।
