खिमराज चालिसे ।
प्रयागराज (भारत) । मूल प्रवाह अखिल भारत नेपाली एकता समाजको नगर सम्मेलन अभियान उत्तर प्रदेशको प्रयागराजबाट सुरु भएको छ ।
“प्रवासी नेपालीको मताधिकार र समानुपातिक प्रतिनिधित्वका लागि सङ्घर्ष गरौँ, भारतस्थित नेपालीको हकहित र सामाजिक सुरक्षाका लागि सङ्गठित बनौँ” मूल नाराका साथ जुन २२–२३, २०२४ देखि सम्मेलन सुरु भएको हो ।
नगर समितिको नवौँ सम्मेलनको उद्घाटन महासचिव प्रेम पौडेलले दीप प्रज्ज्वलित गरी करतल ध्वनिका साथ गर्नुभएको हो ।
सो अवसरमा मन्तव्य राख्दै उहाँले भारतस्थित नेपालीका समस्याबारे चर्चा गर्नुभएको थियो ।
उहाँले देशको वर्तमान अवस्था, भ्रष्टाचार, महङ्गी, बेरोजगारी जस्ता गम्भीर समस्याबारे पनि मूल एकताले बुलन्द आवाज उठाइरहेको बताउनुभयो ।
बन्दसत्रको कार्यक्रम लक्ष्मीप्रसाद ज्ञवालीको अध्यक्षतामा तथा राजु अधिकारीको सञ्चालनमा सम्पन्न भएको थियो भने दुर्गा न्यौपानेले स्वागत भाषण र गोमा थापा, निरा आले, कुमारीलगायतले स्वागत गीतले स्वागत गर्नुभएको थियो ।
सम्मेलनले लक्ष्मीप्रसाद ज्ञवाली अध्यक्ष रहनुभएको ११ पूर्ण, तीन वैकल्पिक र तीन सल्लाहकारसहित १७ सदस्यीय मूल प्रवाहको नगर समिति गठन गरेको छ ।
समितिमा उपाध्यक्ष किसनसिंह परियार, सचिव अनिल आले, सहसचिव सविता शर्मा र कोषाध्यक्ष जङ्गबहादुर राना रहनुभएको छ ।
समितिको सदस्यमाहरूमा गोमा थापा, राजु अधिकारी, रामबहादुर थापा, मोहन खनाल, दुर्गाप्रसाद न्यौपाने र प्रेम थापा रहनुभएको छ ।
त्यस्तै, वैकल्पिक सदस्यहरूमा दीपक सिंह, अरुण सुनार, बुद्धि परिया तथा सल्लाहकारहरूमा रामु बस्याल, शेरबहादुर मगर र आकाश थापा रहनुभएको छ ।
महिला नगर विभाग
सम्मेलनले गोमा थापाको संयोजकत्वमा नौ सदस्यीय महिला नगर विभाग गठन गरेको छ । समितिको सदस्यहरूमा गङ्गा ज्ञवाली, निरा आले, गीता, सविता, प्रमिला सुवेदी, माया राना, कुमारी राना र खिना सुनार रहनुभएको छ ।
सम्मेलनको घोषणासभामा शुभकामना दिने वक्ताहरूमा महासचिव पौडेल, केन्द्रीय सदस्य एवम् क्षेत्रीय अध्यक्ष रामप्रसाद बस्याल, केन्द्रीय सदस्य तालबहादुर खड्का, क्षेत्रीय सदस्य एवम् महिला नेतृ सोनु थापा, क्षेत्रीय सदस्य गोमा थापा, सांस्कृतिक विभागका अर्जुन जिएम, कलाकार विजय थापालगायत हुनुहुन्थ्यो ।
घोषणासभाको कार्यक्रम राजु अधिकारीको सञ्चालनमा तथा किसनसिंह परियारको अध्यक्षतामा सम्पन्न भएको हो भने स्वागत सविता शर्माले गर्नु भएको थियो ।
