काठमाडौं । राष्ट्रिय जनमोर्चाले पोखरामा सहकारी पीडितहरूमाथि भएको दमन र धरपकडप्रति आपत्ति जनाएको छ ।
बिहीबार (जेठ२४ गते) एक विज्ञप्ति प्रकाशित गरी राजमोले सहकारी पीडितहरूको न्यायपूर्ण आवाज सम्बोधन गर्नुको सट्टा दमन गरेको आरोप लगाएको छ ।
सहकारीका बचतकर्ताले प्रधानमन्त्री पुष्पकमल दाहाल ‘प्रचण्ड’ लाई पोखरामा कालो झण्डा र ब्यानर देखाएका छन् ।
बुधबार पोखरा पुगेका प्रधानमन्त्री पुष्पकमल दाहाल प्रचण्डलाई सूर्यदर्शन सहकारीका बचतकर्ताले कालो झण्डा देखाउने क्रममा प्रदर्शनकारीमाथि प्रहरीले बल प्रयोग गरेको थियो । प्रहरीको आक्रमणबाट दुईजना घाइते भएका र ११ जनालाई नियन्त्रणमा लिइएको सहकारी पीडित संघर्ष समितिले जनाएको छ ।
राजमो अध्यक्ष चित्रबहादुर केसीले आज प्रेशित गर्नुभएको वक्तव्यमा ‘प्रधानमन्त्रीकै उपस्थितीमा उनीहरूमाथि दमन, धरपकड, हुने कार्य गम्भीर रुपले भर्त्सनायोग्य रहेको’ बताउनुभएको छ ।
वक्तव्यमा भनिएको छ, ‘२०८१ साल जेठ २३ गते पोखरामा सहकारी पीडितउपर सरकारले गरेको दमन तथा धरपकडको हाम्रो पार्टीले घोर विरोध तथा भर्त्सना गर्दछ । गिरफ्तार गरिएकाको अबिलम्ब रिहा गर्न तथा घाइतेहरुको उपचार गर्न समेत सरकारसँग हाम्रो पार्टी माग गर्दछ ।
पोखरामा सहकारी पीडितहरू आफूले बचत गरेको रकम सहकारीका सञ्चालकहरुले ठगी गरेको विरोधमा लामो समयदेखि संघर्षरत छन् । उनीहरूका मागलाई न्यायोचित रुपमा सम्बोधन गर्नुको सट्टा स्वयम् प्रधानमन्त्रीकै उपस्थितीमा उनीहरूमाथि दमन, धरपकड, हुने कार्य गम्भीर रुपले भर्त्सनायोग्य रहेको छ ।’
