काठमाडौं । नागरिक उन्मुक्ति पार्टीले रेशम चौधरीको रिहाइको माग र मुद्दा सम्बोधन नभएसम्म सुदूरपश्चिम सरकारलाई समर्थन दिन नसक्ने स्पष्ट पारेको छ ।
सुदूरपश्चिमका मुख्यमन्त्री राजेन्द्र सिंह रावलले आज बस्ने प्रदेश सभा बैठकमा विश्वासको मत लिँदैछन् । २७ पुसमा मुख्यमन्त्री नियुक्त रावलले आजै विश्वासको मत लिइसक्नु पर्छ । उनले विश्वासको मत जुटाउन नसकेमा स्वतः पदमुक्त हुनेछन् ।
सुदूरपश्चिममा निर्णायक सत्ता साझेदार दल नागरिक उन्मुक्ति पार्टी रेशम चौधरीको रिहाइलाई ‘बटम लाइन’ बनाएर विश्वासको मतमा अडान थापिरहेको छ ।
‘अहिले हाम्रो पार्टीको एक मात्र माग र मुद्दा राजबन्दी रिहाइ हो । कि रेशम चौधरी छुट्नुपर्यो कि छुट्नुहुन्छ भन्नेमा विश्वस्त बनाउनुपर्यो । प्रक्रियामा गएको भए त्यो पनि क्रंकिटमा आउनुपर्यो’ नागरिक उन्मुक्ति पार्टीका नेता हिमाञ्चलराज भट्टराईले भने, ‘अब हामी मौखिक कुरा मान्दैनौं, लिखित कागज केन्द्रीय सरकारले नदिईकन सुदूरपश्चिम सरकारलाई विश्वासको मत दिन सक्दैनौं ।’
मुख्यमन्त्री राजेन्द्रसिंह रावललाई विश्वासको मत दिने अन्तिम दिनमासमेत उन्मुक्तिका सांसदहरु काठमाडौंमै छन् । उनीहरु भोलि मात्रै सुदूरपश्चिम फर्कने बताउँछन् ।
अहिलेको सरकार ढले अर्को सरकार बन्ने विकल्प रहेको पनि भट्टराईले बताए ।
संविधानको धारा १८३ (३) अनुसार प्रदेश सभाको सबैभन्दा ठूलो दल नेपाली कांग्रेसका संसदीय दलका नेता कमल बहादुर शाह मुख्यमन्त्री बन्ने छन्।
यस्तै, उनले आफ्नो पार्टीले सुदूरपश्चिम प्रदेश सरकारको नेतृत्व गर्ने सम्भावना पनि रहेको दाबी गरे ।
