काठमाडौं । ओमान नेपाली एकता समाजले गम्भीर घाइते भइ उपचाररत पर्वतका दुर्गाप्रसाद पौडेललाई सहयोग गरेको छ ।

पर्वतको महाशिला गाउँपालिका–१ दरबारडाँडा टोलका ४१ वर्षीय पौडेल यही पुस ४ गते दाउरा काट्ने क्रममा रुखबाट लडेर घाइते भएका थिए । करङ र मेरुदण्ड भाँचिएर गम्भीर घाइते उनको काठमाडौंस्थित ट्रमा सेन्टरमा उपचार भइरहेको छ ।

आर्थिक अवस्था नाजुक रहेका पौडेललाई उपचार सहयोगका लागि ओमान नेपाली एकता समाजले ५१ हजार ७५ रुपैयाँ सहयोग गरेको छ । सो रकम समाजका केन्द्रीय कोषाध्यक्ष दिपक रम्तेलले मंगलबार हस्पिटलमै गइ बिरामीका दाजु लाई हस्तान्तरण गर्नुभयो ।

सो क्रममा रम्तेलले बिरामीको सीघ्र स्वास्थ्य लाभको कामना पनि गर्नुभयो । ओमान नेपाली एकता समाजले गम्भीर घाइते पौडेलको उपचारका लागि सहयोग गर्न आह्वान पनि गरेको छ ।