कर्णाली । राष्ट्रिय जनमोर्चाका केन्द्रीय उपाध्यक्ष जनकराज शर्माले एमसीसी पारित गर्न नहुने बताउनुभयो ।
कर्णाली प्रदेश राजधानी वीरेन्द्रनगर सुर्खेतमा शुक्रबार सात राजनीतिक पार्टीले आयोजना गरेको संयुक्त पत्रकार सम्मेलनमा उहाँले एमसीसी सम्झौता भएका प्रावधान नेपाली जनताको हितमा नभएको जिकीर गर्नुभएको हो ।
त्यस्तै, विभिन्न राजनीतिक पार्टीका नेताहरूले मिलिनियम च्यालेन्ज कर्पोरेसन (एमसीसी) नेपालको हितमा नभएको जिकीर गरेका छन् । संयुक्त पत्रकार सम्मेलनमा नेताहरूले एमसीसीमा उल्लेख गरिएका प्रावधान नेपालको पक्षमा नभएको दाबी गरेका हुन् ।
नेकपा (क्रान्तिकारी माओवादी) कर्णाली प्रदेश समिति इन्चार्ज शिपी शर्मा, नेकपा (मसाल) कर्णाली प्रदेश प्रतिनिधि मोहन थापा, नेपाल कम्युनिष्ट पार्टीका केन्द्रीय सदस्य एटम बिसी, वैज्ञानिक समाजवादी कम्युनिष्ट पार्टी कर्णाली प्रदेश समिति संयोजक श्याम कुँवर, देशभक्त जनगणतान्त्रिक मोर्चा नेपालका कर्णाली प्रदेश समिति अध्यक्ष दीपकबहादुर शाही, नेपाल कम्युनिष्ट पार्टी (माले) का कर्णाली प्रदेश समिति सचिव बलबहादुर कुँवरलगायतले एमसीसी देशको हितमा नभएको बताएका छन् ।
राष्ट्रिय जनमोर्चाका जिल्ला अध्यक्ष गोविन्दप्रसाद सुबेदीको अध्यक्षता रहेको उक्त कार्यक्रममा वैज्ञानिक समाजवादी कम्युनिष्ट पार्टीका अस्मिता बादीको सञ्चालन तथा श्याम कार्कीले स्वागत गर्नुभएको थियो ।
साथै उक्त पत्रकार भेटघाट कार्यक्रममा यहि मंसिर २७ गते १ बजे एमसीसीको विरोध कार्यक्रम रहेको समेत जानकारी गराईएको थियो ।
