काठमाडौं ।नेपाल कम्युनिष्ट पार्टी (मसाल) ले भारतले नेपाली भूभाग समेटेर नयाँ नक्सा तयार पारेपछि त्यसविरुद्ध जनतामा देखिएको एकता र देशभक्तिको भावना स्वागतयोग्य रहेको बताएको छ । भारतले पहिल्यैदेखि विभिन्न भागमा सिमा अतिक्रमण गर्दै आएको र त्यस विरुद्ध पार्टीले कडा प्रतिवाद गर्दै आएको स्मरण गर्दै मसालले अतिक्रमण अझै बढ्ने खतरा औँल्याएको छ ।
महामन्त्री मोहन विक्रम सिंहले सोमबार एक वक्तव्य प्रकाशित गरी जनताको एकताका आधारमा भारतीय साम्राज्यवादलाई परास्त गर्न र नेपालको राष्ट्रियता रक्षा गर्न नेपाली जनता सफल हुने विश्वास व्यक्त गर्नुभएको छ ।
वक्तव्यमा भनिएको छ, ‘कालापानी समेतका क्षेत्रहरूमा भारतीय साम्राज्यवादले गरेको अतिक्रमणका विरुद्ध हाम्रो पार्टीले पहिलेदेखि नै कडा विरोध गर्दै आएको छ । अहिले भारतले निकालेको नयाँ नक्साले त्यो खतरालाई अरू गम्भीर बनाएको छ । तर, भारतको त्यस प्रकारको नीतिका विरुद्ध देशव्यापी रूपमा जुन विरोध कार्यक्रमहरू सम्पन्न भएका छन्, त्यसले नेपाली जनताको उच्च प्रकारको देशभक्तिको भावनालाई प्रदर्शन गरेको छ ।
त्यस सन्दर्भमा सरकार सहित विभिन्न राजनीतिक पार्टी वा सङ्गठनहरूमा जुन ऐक्यवद्धता देखापरेको छ, त्यसलाई नेकपा (मसाल)ले स्वागत गर्दछ । त्यस प्रकारको ऐक्यवद्धताको आधारमा नेपाल आफ्नो राष्ट्रियता र सार्वभौमिकताको रक्षा गर्न सफल हुनेछ भन्ने कुरामा हाम्रो पार्टीले पूरा विश्वास राख्दछ ।’
