काठमाडौं । भारतले कालापानी लगायतका नपाली भूभाग समेटेर बनाएको नक्सा तथा अतिक्रमण विरुद्ध राष्ट्रिय जनमोर्चाले देशका विभिन्न भागमा प्रदर्शन गरेको छ । शनिबार धनगढी, बुटवल, अघाँखाँची, रौतहटलगायत देशका विभिन्न जिल्लाहरुमा प्रदर्शन गरी ‘गो ब्याक ईण्डिया’ को नारा लगाइएको छ ।

कैलालीबाट प्रशान्त थापाले दिनुभएको जानकारी अनुसार अहिले धनगढीको एलएल चोकमाविरोध प्रदर्शन तथा कोणसभाको आयोजना गरिएको छ । कार्यक्रमलाई राष्ट्रिय जनमोर्चाका केन्द्रीयय सदस्य मनोज भट्टले सम्बोधन गर्नुभएको छ ।

सम्बोधनका क्रममा नेता भट्टले वर्षौंदेखि भारतले नेपालको लिपुलेक, कालापानी, लिम्पियाधुरा लगायतका ठाउँमा अतिक्रमण गर्दै आएकोमा अब नक्सामै ति क्षेत्र समेटेर अतिक्रमणलाई वैधानिकता दिएको बताउनुभयो । भट्टले अतिक्रमित भूभाग फिर्ता गराउन अहिले नै जनताले कडा संघर्ष नगरे ति भाग मात्रै गुमाउनु पर्ने नभइ अतिक्रमण फैलँदै जाने खतरा औँल्याउनुभयो ।

कोणसभामा अहिल (छैठौं) का केन्द्रीय सदस्य उमेश कँडेल, अखिल नेपाल युवक संघका केन्द्रीय सचिव प्रशान्त थापाले सम्बोधन गर्नुभएको छ ।

यता, बुटवलमा भएको विरोध सभालाई सम्बोधन गर्दै अखिल नेपाल किसान महासंघका केन्द्रीय उपाध्यक्ष चन्द्रबहादुर केसीले सम्बोधन गर्दै भारतीय साम्रज्यवाद विरुद्ध एकजुट हुन सम्पुर्ण देशभक्त जनतासित अपिल गर्नुभएको छ ।

प्रगतिशील पत्रकार संघका कोषाध्यक्ष श्याम पोखरेलले दिनुभएको जानकारी अनुसार कार्यक्रमलाई राजमोका पूर्व केन्द्रीय कोषाध्यक्ष ओमबहादुर केसी, रुपन्देही उद्योग व्यापार संगठनका अध्यक्ष नेत्र आचार्य, गुल्मीको कालीगण्डकी गाउँपालिकाका उपाध्यक्ष तारा थापा क्षेत्री लगायतका नेताहरुले सम्बोधन गर्नुभएको थियो ।

यसैगरी, अघाखाँचीमा पनि राजमोले प्रदर्शन सहित ‘गो ब्याक ईण्डिया’ को नारा लगाएको छ । कार्यक्रमलाई राजमोका जिल्ला अध्यक्ष थम्मन केसी, नेकपा (मसाल) का जिल्ला प्रवक्ता पशुपति ढकाल र अखिल (छैठौं) का केन्द्रीय उपाध्यक्ष देवेन्द्र कुँवरले सम्बोधन गर्नुभएको थियो । कार्यक्रमको सञ्चालन राजमो जिल्ला सचिव बाबुराम पन्थीले गर्नुभएको थियो ।

प्रदेश २ को रौतहटमा पनि भारतीय साम्राज्यवादी हस्तक्षेप विरुद्ध राजमोले विरोध प्रदर्शन गरेको छ । शनिबार गौरमा आयोजित विरोध कार्यक्रमलाई राष्ट्रिय जनमोर्चाका केन्द्रीय सदस्य चिन्तमणी पौडेल र जिल्ला अध्यक्ष हरिकिशोर महतोले सम्बोधन गर्नुभएको थियो । कार्यक्रमको सञ्चालन राजमो जिल्ला कोषाध्यक्ष लक्ष्मीनारायण श्रीवास्तवले गर्नुभएको थियो ।

यस्तै, राजमो डोटीले पनि शुक्रबार विरोध प्रदर्शन गरेको राजमो डोटीका सचिव केशवनाथ योगीले जानकारी दिनुभएको छ ।