काठमाडौं । संविधानसभाबाट आफ्नो संविधान आफै बनाउँदा भारतले नेपालमाथि पाँच महिना लामो नाकाबन्दी लगायो । तर, नेपाली कांग्रेसले ‘नाकाबन्दी’ भन्नै सकेन ।
अहिले भने कालापानी समेटेर भारतले बनाएको नक्सा विरुद्ध कांग्रेसको भातृ संगठन नेविसंघ विरोध प्रदर्शनमा उत्रिएको छ । त्यो पनि ‘भारतीय विस्तारवाद– मुर्दावाद !’ को नारा लगाउँदै ।
शुक्रबार बिहान पशुपति क्याम्पस चाबहिलबाट सुरु भएको प्रदर्शनमा सहभागीहरूले ‘भारतीय विस्तारबाद मुर्दावाद’, ‘कालापानी, लिम्पियाधुरा र लिपुलेक फिर्ता गर’, ‘गो ब्याक इण्डिया’लगायतका नारा लगाएका थिए ।
कांग्रेस निकट विद्यार्थी संगठनको यो कदमलाई सकारात्मक रुपमा विश्लेषण गरिएको छ । यसलाई कतिपयले कांग्रेस सुध्रिने संकेतका रुपमा समेत लिएका छन् ।
यस्तै, भारतीय दूतावास अगाडि विद्यार्थीहरुले भारतको नक्सा जलाएका छन् । संयुक्त विद्यार्थी आन्दोलनको ब्यानरमा गरिएको प्रदर्शनका क्रममा भारतीय दूतावास अघि भारतको नक्सा जलाएका हुन् । त्यस क्रममा उनीहरुले अतिक्रमित सम्पूर्ण नेपाली भूमि फिर्ता गर्नुपर्ने मागसहित नारा लगाएका थिए ।’
भारतले हालै जारी गरेको राजनीतिक नक्सामा कालापानी, लिम्पियाधुरा र लिपुलेकलाई भारतीय सीमाभित्र पारिएको छ । यसको नेपालमा चौतर्फी विरोध भइरहेको छ ।
