महेन्द्रनगर । सुदूरपश्चिम प्रदेशका उद्योग, पर्यटन, वन तथा वातावरण राज्यमन्त्री प्रकाश रावल ठगी काण्डमा मुछिएका छन् । रावलसहित ३६ जना विरुद्ध १५ करोड ६७ लाख ५० हजार रुपैयाँ ठगी गरेको आरोपमा कञ्चनपुर जिल्ला अदालतमा मुद्दा दायर गरिएको छ ।

कञ्चनपुरको महेन्द्रनगरमा रहेको जनज्योति एजुकेसन फाउन्डेसनको सेयरबापतको रकम ठगी गरेको भन्दै उनीहरुविरुद्ध सोही फाउण्डेशनका ताराप्रसाद जोशी, रुकमणि जोशीसहित १० जनाले उनीहरूविरुद्ध ठगी तथा कागज किर्ते अभियोगमा मुद्दा दायर गरेका हुन् ।

राज्यमन्त्री रावल जनज्योति बहुमुखि क्याम्पस सञ्चालक समितिका पूर्वअध्यक्ष तथा सेयर सदस्यसमेत हुन् । उनीसहित क्याम्पसका पूर्व प्रमुख एवं वहालवाला शिक्षकहरु विरुद्ध मुद्दा परेको हो । जनज्योति एजुकेसन फाउन्डेसनमा हाल पुरानो २९ गरी जम्मा १८८ सेयर छन्।

आर्थिक कारोबार गर्दा बैंक प्रणालीबाट गर्नु पर्ने सो नगरेको, मूल्यांकनै नगरी आफ्नो सेयर ५५ लाख कायम गरिएको, पुँजीगत लाभकर चुक्ता नगरेको, किर्ते कागजपत्र बनाएको, झुटो अडिट रिपोर्ट तयार पारी ठगी गरेको, नयाँ सेयर सदस्यलाई प्रमाण पत्र नदिएकोजस्ता विभिन्न अभियोग छन् ।

मुद्दा दर्ता भएको तीन महिनाको अवधिमा केही अदालत हाजिर भएको र तीमध्ये धेरैजसो अभियुक्त धरौटीमा रिहा भएको कञ्चनपुरा जिल्ला अदालतले जनाएको छ । अन्यको हकमा म्याद बाँकी रहेकाले सोही म्यादभित्र उनिहरू हाजिर हुने जनाइएको छ ।

व्यवसायीक पृष्ठभूमिका राज्यमन्त्री रावल कञ्चनपुर क्षेत्र नम्बर ३ प्रदेशसभा ‘क’ बाट निर्वाचित नेकपा सांसद हुन् ।