काठमाडौं । सरकारले त्रिभुवन विश्वविद्यालयको उपकुलपतिमा डा. धर्मकान्त बाँस्कोटा नियुक्त गरेको छ । प्रधानमन्त्री तथा कुलपति केपी ओलीले आइतबार डा. बाँस्कोटालाई नियुक्त गरेका हुन् ।

यसअघि मेडिकल काउन्सिल अध्यक्ष पनि रहिसकेका डा. बाँस्कोटा नाक, कान, घाँटीविशेषज्ञ हुन् । उनी राष्ट्रपति विद्यादेवी भण्डारीका निजी चिकित्सक समेत हुन् । यससँगै डा. बाँस्कोटा त्रिविको १९ औं उपकुलपति बनेका छन् ।

यस्तै, सरकारले मेडिकल काउन्सिलको अध्यक्षमा डा. भगवान कोइरालालाई नियुक्त गरेको छ । आइतबार मध्यान्ह प्रधानमन्त्री निवास बालुवाटारमा बसेको मन्त्रिपरिषद बैठकले डा. कोइरालालाई काउन्सिलको अध्यक्षमा नियुक्त गर्ने निर्णय गरेको हो ।

डा. कोइराला मुटु रोग विशेषज्ञ हुन् । उनी यसअघि त्रिवि शिक्षण अस्पतालका कार्यकारी निर्देशक र शहीद गंगालाल हृदय रोग केन्द्रका निर्देशक थिए ।