प्रज्ज्वल पहाडी, खलङ्गा ।

अखिल नेपाल राष्ट्रिय स्वतन्त्र विद्यार्थी युनियन (छैंठौं) को प्युठान नगरपालिका स्तरीय प्रथम सम्मेलन सम्पन्न भएको छ ।

२०८१ साउन २८ गते सोमबार प्युठान नगरपालिकास्थित स्वर्गद्धारी बहुमुखी क्याम्पस पुण्यखोलामा उक्त सम्मेलन सम्पन्न भएको हो ।
सम्मेलनले निर्मला पुनमगरको अध्यक्षतामा १७ सदस्यीय नगर स्तरीय समिति चयन गरेको छ ।

समितिको उपाध्यक्षमा माया घर्ती, सचिवमा शुशीला घर्ती, सहसचिवमा सागर सुनार र कोषाध्यक्षमा शेरबहादुर सुनार रहनुभएको छ ।

त्यसैगरी सदस्यहरूमा वसन्ता विष्ट, गीता योगी, मधु गिरी, बबिता बैजाली, मेनुका केसी, दिलमाया पुनमगर, प्रकाश राउत, निसा गयलमगर, ममता गयलमगर, वर्षा योगी, समीर विक र सुतित्रा पुनमगर रहनुभएको छ ।

शिक्षाप्रणालीमा आमूल परिवर्तन आवश्यक : जिसी

सम्मेलनको उद्घाटन शत्रलाई सम्बोधन गर्दै महासचिव सुवास जिसीले नेपालको शिक्षाप्रणालीमा आमूल परिवर्तनको आवश्यकता रहेको बताए ।

‘अव्यावहारिक शिक्षाप्रणालीका कारण शैक्षिक प्रमाणपत्र लिएर आम विद्यार्थी बेरोजगार बन्ने स्थिति छ’ जिसीले भने– ॅनेपालको शिक्षाप्रणालीको सुधारका लागि हामी सम्झौताहीन सङ्घर्षलाई अगाडि बढाउँदै आएका छौँ ।’

राजनैतिक परिवर्तनमा विद्यार्थीको महत्त्वपूर्ण भूमिका भएता पनि शिक्षाको आमूल परिवर्तनमा ठुला राजनैतिक दलहरू उदासिन रहदै आएको उनको भनाइ थियो । विद्यार्थी सचेत वर्ग भएकाले राजनीतिमा सचेत वर्गको उपस्थिति आवश्यक रहेको उनले बताए ।

राज्यको विभिन्न ओहोदामा पुग्नेहरू जनताको प्रश्नदेखि डराएको चित्रण गर्दै उनले भने– ‘प्रश्न गर्नेहरू राजनीतिमा लाग्नुहुन्न भनेर सिकाउनु उनीहरूको पाखण्ड हो ।’

ठुला राजनैतिक दलहरू सत्तास्वार्थमा मात्रै केन्द्रित रहदा देशको राजनैतिक प्रणाली र राष्ट्रियतासमेत कमजोर हुँदै आएको उनले बताए ।

‘शक्ति र सत्ता हाम्रा लागी गौण कुरा हो’ उनले भने– ‘देशको शैक्षिक प्रणाली र राष्ट्रियताको रक्षाका लागि हामी गोलबन्द हुन आवश्यक छ ।’

सम्मेलनलाई सम्बोधन गर्दै नेकपा (मसाल) दुम्बिनी प्रदेशका प्रवक्ता तिलक जिसीले देशको राजनैतिक प्रणालीको सुधारमा विद्यार्थी आन्दोलनको भूमिका महत्त्वपूर्ण रहेको बताए । ठुला राजनैतिक पार्टीहरूले सत्तास्वार्थका लागि मात्रै विद्यार्थी आन्दोलनलाई उपयोग गर्दै आएको उनको भनाइ थियो ।

कार्यक्रमा राजमो प्युठानका सचिवालय सदस्य लालबहादुर राउत, जिल्ला सदस्य धुव्र थापा र प्युठान नगरपालिका–५ नम्वर वडाका अध्यक्ष धनबहादुर केसीले पनि सम्बोधन गरेका थिए ।
माया घर्तीको अध्यक्षता तथा विद्यार्थी शुशीला घर्तीको सञ्चालनमा सो कार्यक्रम अगाडि बढेको थियो ।