काठमाडौँ । राष्ट्रिय जनमोर्चाका महासचिव मनोज भट्टले नेपाल स्वाधीन मुलुक नभएको दाबी गर्नुभएको छ ।
नेपालमा संविधान बनाउनेसम्मका विदेशी प्रोजेक्ट पटक पटक चल्ने गरेको बताउँदै उहाँले यस्तो दावी गर्नुभएको हो ।
२०८१ साउन २६ गते शनिबारका दिन अखिल नेपाल कानुन व्यवसायी सङ्घ (अन्ला) को बागमती प्रदेश भेलालाई प्रमुख अतिथिको आसनबाट सम्बोधन गर्दै उहाँले नेपालमा संविधान बनाउन विदेशी प्रोजेक्ट आउने गरेको जानकारी दिनुभयो ।
‘२०१५ सालतिर नेपालको संविधान बनाउन राजा महेन्द्रले एक जना विदेशीलाई प्रोजेक्ट दिएका थिए’ महासचिव भट्टले खुलासा गर्नुभयो– ‘राजा महेन्द्रले ती विदेशीलाई संविधानमा आफ्नो अधिकार बढाउन भने, तबसम्म ती विदेशी नागरिकको भिसा अवधि समाप्त भइसकेको थियो । त्यसैले ती विदेशी नागरिकले महेन्द्रको इच्छाअनुसार काम गर्न सकेनन् र आफ्नो देश फर्के ।’
उहाँले ती विदेशी नागरिकले आफ्नो भिसा अवधि सकिएकाले नेपालकै वकिलहरूबाट सो काम गर्न आग्रह गरेको पनि जानकारी दिनुभयो ।
यस्तो सिलसिला २०७२ सालको संविधान बनाउने सिलसिलामा पनि चलेको उहाँले दाबी गर्नुभयो ।
‘२०७२ सालमा पनि घानाको संविधान बनाएका एक जना भारतीय मूलका व्यक्तिले नेपालको संविधान बनाउन प्रोजेक्ट मागेका थिए’ राजमो नेता भट्टले भन्नुभयो ।
उहाँले नेपालमा सङ्घीयता भित्राउनका लागि ९७ अर्ब रुपियाँ खर्च भएको बताउँदै अगाडि भन्नुभयो– ‘त्यसमध्ये पछि जातीय सङ्घीयताका लागि कैयौँ जनजाति नेताहरूलाई प्रायोजित गरिएको थियो । उनीहरूले नेपालमा बसेर जातिवाद र जातीय सङ्घीयताको पक्षमा वकालत गर्दथे ।’
सोही प्रसङ्गमा उहाँले नेपालमा विदेशीहरूको माइक्रो म्यानेजमेन्ट हुने गरेको बताउनुभयो ।
‘अख्तियार दुरुपयोग अनुसन्धान आयोगको प्रमुख कसलाई राख्ने ? मुख्य सचिव कसलाई नियुक्त गर्ने ? यस्ता सवालमा हामीले विदेशी शक्तिहरूको आदेश मान्नुपर्दछ’ उहाँले प्रश्न गर्नुभयो– ॅयसबाट हाम्रो अलग भूगोल, अलग झन्डा, अलग नक्सा भए पनि हामी पूर्ण स्वाधीन छैनौँ भन्ने पुष्टि हुन्छ ।’
उहाँले नेपाल अझै पनि अर्धसामन्ती र अर्धऔपनिवेशिक चरित्रमा रहेको दावी गर्नुभयो ।
वकिलमा विदेशी घुसपैठ
मन्तव्यको क्रममा उहाँले नेपालका वकिलहरूमाझ विदेशी घुसपैठको सन्दर्भ प्रस्तुत गर्नुभयो ।
‘वकिलहरूमा पनि विदेशी घुसपैठ छ’ उहाँले भन्नुभयो– ‘नेपालमा २७ हजार वकिलमध्ये कैयौँमा एनजिओ, आइएनजिओको घुसपैठ छ ।’
उहाँले अन्ला यस्तो घुसपैठबाट बचेको वकिलहरूको सङ्गठन भएको स्पष्ट पार्नुभयो ।
कानुनका विद्यार्थीसमेत रहनुभएका भट्टले अगाडि अन्लाका साथीहरूलाई भन्नुभयो– ‘तपाईंहरू न्यायको पक्षमा हुनुहुन्छ । त्यसैले आत्मविश्वासका साथ काम गर्नुस् । तपाईंहरू अवश्य सफल हुनुहुन्छ ।’
