काठमाडौँ । राष्ट्रिय जनमोर्चाले बाढीपहिरो र हेलिकोप्टर दुर्घटनाका मृतक श्रद्धाञ्जली व्यक्त गरेको छ ।
अध्यक्ष चित्रबहादुर केसीको हस्ताक्षरमा २०८१ साउन २४ गते बिहीबार शोकवक्तव्य जारी गर्दै राजमोले श्रद्धाञ्जलीसँगै शोकसन्तप्त परिवारजनप्रति समवेदना व्यक्त गरेको हो ।
वक्तव्यमा बाढीपहिरोका पीडित जनताका लागि तुरुन्त राहत उपलब्ध गराउन, उद्धार तथा खोजीकार्यलाई ठोस प्रभावकारी बनाउन तथा क्षति न्युनीकरणका लागि आवश्यक कदम उठाउन पनि माग गरिएको छ ।
साउन २३ गते भएको हेलिकोप्टर दुर्घटनाका मृतकप्रति समेत श्रद्धाञ्जली र सन्तप्त परिवारजनप्रति समवेदना व्यक्त गरिएको शोकवक्तव्यको पूर्ण पाठ यस्तो छ :
“बागलुङ, गुल्मी जिल्लालगायत देशभरिका विभिन्न स्थानमा बाढीपहिरोले गरेको धनजनको क्षतिप्रति हाम्रो पार्टीले गम्भीर चिन्ता प्रकट गर्दछ । उक्त बाढी पहिरोमा परी ज्यान गुमाउने सबैप्रति हामीले हार्दिक श्रद्धाञ्जली प्रकट गर्दै सन्तप्त परिवारजनप्रति समवेदना प्रकट गर्दछौँ ।
बाढीपहिरोबाट पीडित जनतालाई तुरुन्त राहत उपलब्ध गराउनका लागि हामीले सरकारसित माग गर्दछौँ । कैयौँ व्यक्तिहरू बाढीपहिरोमा परी बेपत्ता भएकाहरूको उद्धार र खोजीकार्यलाई ठोस र प्रभावकारी बनाउनका साथै मृतकका परिवारजनलाई आवश्यक क्षतिपूर्ति उपलब्ध गराउनका लागि हामीले सरकारको ध्यान आकर्षित गर्दछौँ । बाढीपहिरोबाट हुन सक्ने थप क्षतिलाई ध्यानमा राखेर त्यसलाई न्युनीकरण गर्न सरकारले प्रभावकारी कदम उठाउनुपर्ने आवश्यकतामाथि हामीले जोड दिन्छौँ र त्यसका लागि हामीले सरकारसित माग गर्दछौँ ।
हिजो भएको हेलिकोप्टर दुर्घटनाप्रति हामीले गम्भीर दुःख व्यक्त गर्दछौँ । उक्त दुर्घटनामा परी ज्यान गुमाउने देश र विदेशका सबै नागरिकप्रति हामीले हार्दिक श्रद्धाञ्जली प्रकट गर्दै सन्तप्त परिवारजनप्रति समवेदना प्रकट गर्दछौँ ।”
