काठमाडौँ । राष्ट्रिय जनमोर्चाका अध्यक्ष चित्रबहादुर केसीले समाज बदल्न हिँडेको मान्छे सर्वप्रथम आफै बदलिनुपर्ने आवश्यकतामा जोड दिनुभएको छ ।
अखिल नेपाल कानुन व्यवयासी सङ्घ (अन्ला) को एघारौँ स्थापना दिवसको अवसरमा २०८१ साउन १० गते बिहीबार आयोजित औपचारिक कार्यक्रममा प्रमुख अतिथिको आसनबाट मन्तव्य राख्दै उहाँले यस्तो दावी गर्नुभएको हो ।
‘समाज बदल्न हिँडेको मान्छे सर्वप्रथम आफै बदलिनुपर्दछ’ उहाँले भन्नुभयो– ‘यसरी बदलिएको मान्छेले नै समाजलाई बदल्न सक्दछ ।’
अध्यक्ष केसीले आफै बिग्रेको मान्छेले समाज बदल्न नसक्ने प्रष्ट पार्नुभयो ।
उहाँको विश्लेषण थियो– ‘अहिलेसम्म समाज नबदलिएको त समाज बदल्न हिँडेका मानिसहरू नबदलिएर नै हो ।’
सम्बोधनको क्रममा उहाँले सबैभन्दा गाह्रो विषय भनेकै आफू बदलिनु भएको बताउनुभयो ।
‘वर्गदुस्मनसँग सङ्घर्ष गर्नुभन्दा पहिला आफ्ना विचार, चरित्र र बानीव्यहोरासित सङ्घर्ष गर्न गाह्रो छ’ उहाँको भनाइ थियो ।
उहाँले समाज बदल्ने यो भन्दा अर्को बाटो नभएको निष्कर्ष सुनाउनुभयो ।
उहाँले भन्नुभयो– ‘राष्ट्र र जनताको पक्षमा काम गर्न गाह्रो छ । त्यस क्रममा आफै बदलिनुपर्दछ तर यसैमा राष्ट्र र जनताको मुक्ति छ ।’
फरक प्रसङ्गमा अध्यक्ष केसीले सही र क्रान्तिकारी विचार रक्षा नै आजको मुख्य विषय भएको बताउनुभयो ।
‘बिउ रहे बाली फस्टाउँछ । अहिले त्यही बिउ जोगाउने समय हो’ क्रान्तिकारी विचारलाई बिउको सङ्ख्या दिँदै उहाँले भन्नुभयो– ‘हाम्रो आशा तपाईंहरूमाथि छ ।’
विचार सकियो भने पार्टीको काममा दिग्दारी लाग्ने बताउँदै उहाँले सबैभन्दा आफू विरुद्ध सङ्घर्ष गरेर विचार जोगाउनुपर्नेमा जोड दिनुभयो ।
अन्लाका अध्यक्ष अधिवक्ता पदम रोकाको अध्यक्षता तथा महासचिव लक्ष्मणदेव पाण्डेको सञ्चालनमा अघि बढेको थियो ।
कार्यक्रममा नेकपा (मसाल) का प्रवक्ता रामप्रकाश पुरी, वामपन्थी नेता आनन्द शर्मा, अखिल नेपाल महिला सङ्घकी अध्यक्ष मीना पुन, राजमो केन्द्रीय सचिव घनश्याम न्यौपाने, अखिल नेपाल जनजाति सम्मेलनका अध्यक्ष निमबहादुर बुढाथोकी, अखिल नेपाल शिक्षक सङ्घका अध्यक्ष सानोभाइ कार्की, प्रगतिशील पत्रकार सङ्घका महासचिव प्रकाश थापामगर, रक्तिम सांस्कृतिक अभियानका महासचिव हेमराज आश्रम, अखिल नेपाल बुद्धिजीवी सङ्घका केन्द्रीय सचिवालय सदस्य दुर्गानाथ खरेल, अखिल नेपाल राष्ट्रिय उद्योग व्यापार सङ्घका केन्द्रीय सचिव बी.बी. अधिकारी र अखिल नेपाल किसान महासङ्घ (अप्फा) का केन्द्रीय सदस्य केबी घलेले मन्तव्य राख्नुभएको थियो ।
कार्यक्रममा राजमो केन्द्रीय कोषाध्यक्ष मधु क्षेत्रीको पनि आतिथ्य रहेको थियो ।
उपाध्यक्ष रामप्रसाद शर्माले स्वागत मन्तव्य राख्नुभएको सो कार्यक्रममा अधिवक्ताहरू उषा पोख्रेल, अनिता जिसी, मधुसूदन सापकोटा, भीष्म जोशी, स्वस्तिका दुलाल, प्रवीण भट्टराई, रोचक ढुङ्गेल र प्रतिमा रोकालाई प्रमुख अतिथिले सम्मान गर्नुभएको थियो ।
सम्मानित अधिवक्ताहरूको तर्फबाट अनिता शाही र भीष्म जोशीले समेत मन्तव्य राख्नुभएको थियो ।
