काठमाडौँ । राष्ट्रिय जनमोर्चाले आगामी २०८१ असार २२ गते शनिबार दिउसो १२ः३० बजे बागबजारको हार्दिक होटलमा सहकारीसम्बन्धी अन्तरक्रिया गर्ने भएको छ ।
राजमो केन्द्रीय कार्यालयको आयोजनामा सो मिति र स्थानमा “सहकारी रकम अपचलन र त्यसमा राज्यले गरेको संरक्षणबाट उत्पन्न परिस्थिति” विषयक कार्यक्रम सम्पन्न हुन थालेको हो ।
अन्तरक्रियामा राजमो अध्यक्ष तथा प्रतिनिधि सभाका सांसद चित्रबहादुर केसीले अवधारणापत्र प्रस्तुत गर्नुहुने छ ।
राजमो केन्द्रीय कार्यालयका सचिव मधु क्षेत्रीका अनुसार उक्त कार्यक्रममा नेकपा (मसाल) का प्रवक्ता रामप्रकाश पुरी, पूर्व उपप्रधानमन्त्री डा. भीम रावल, नेपाली काङ्ग्रेस संसदीय दलका प्रमुख सचेतक रमेश लेखक, पूर्व न्यायाधीश गौरीबहादुर कार्की, सङ्कटग्रस्त सहकारी व्यवस्थापन समितिका पूर्व अध्यक्ष काँशीराज दाहाल, सहकारी विज्ञ डा. विश्वमोहन आचार्य र नेपाल सरकारका पूर्व उपसचिव बाबुराम भुसालले मन्तव्य राख्नुहुने छ ।
