बेइजिङ । दक्षिणी चीनको गुआङ्डोङ प्रान्तको एक पूर्वप्राथमिक (किन्डरगार्टेन) विद्यालयमा सोमबार भएको आक्रमणमा परी छ जनाको मृत्यु हुनुका साथै एक जना घाइते भएका छन् । मृत्यु हुनेमा एक शिक्षक, दुई अभिभावक र तीन विद्यार्थी रहेका छन् ।
चाइना न्यूज नेटवर्कका अनुसार स्थानीय समयअनुसार ७:४० बजे उक्त घटना भएको हो ।
सरकारी प्रवक्ताका अनुसार लियानजियाङ सहरमा भएको आक्रमणमा प्रयोग भएका हतियार, पीडितको पहिचान र उमेरबारे विस्तृत जानकारी दिनुभएको छैन ।
‘घटनामा सम्लग्न रहेको आरोपमा शङ्कास्पद एक जनालाई पक्राउ गरिएको छ’ उहाँले भन्नुभयो । प्रहरीले घटनाको अनुसन्धान भइरहेको जनाएको छ ।
स्थानीय प्रहरीले जारी गरेको विज्ञप्तिमा भनिएको छ– ‘शङ्कास्पद व्यक्ति वू नाम गरेका २५ वर्षीय पुरुष रहेका र उनको घटनासँगको संलग्नताबारे अनुसन्धान भइरहेको छ ।’
अपराधस्थल देखाउने दाबी गर्दै पैदल यात्रीहरूले खिचेको र पोस्ट भएका भिडियोहरू चीनमा प्रसिद्ध सामाजिक सञ्जाल वेइबोबाट हटाइएको छ ।
बन्दुकलाई कडाइका साथ नियन्त्रण गरिए पनि चीनले धारिलो हतियार प्रहार गरी हुने घटनालाई नियन्त्रण गर्न सङ्घर्ष गरिरहनुपरेको छ । (राससरसिन्ह्वा)
