काठमाडौं । नेकपा (मसाल) ले चौतर्फी दबाबका बाबजुद प्रधानमन्त्री पुष्पकमल दाहालले रवि लामिछानेलाई पुनः गृहमन्त्री बनाउन अस्वीकार गरेकोप्रति धन्यवाद दिएको छ ।
गैरनेपाली व्यक्तिलाई वर्तमान सत्ता गठबन्धनले देशको उपप्रधानमन्त्री तथा गृह मन्त्रालयको जिम्मेवारी सुम्पनु गम्भीर आपत्तिको विषय भएको मसालले बताएको छ । प्रधानमन्त्री दाहालले रविलाई पुनः गृहमन्त्री नबनाएर केही हदसम्म आफ्नो गल्ती सच्याएको बताएको छ ।
महामन्त्री मोहनविक्रम सिंहले मंगलबार जारी गरेको विज्ञप्तिमा सत्ता छोड्नुपर्दा रविले व्यक्त गरेका कुराले नै उनी अत्यन्त गैरराजनीतिक व्यक्ति भएको स्पष्ट भएको पनि बताउनुभएको छ ।
साथै, नेपाली सञ्चार क्षेत्रले रविप्रति सही राजनीतिक दृष्टिकोण अपनाएकोमा पनि धन्यवाद दिइएको छ ।
मसालले रविको नागरिकता र पासपोर्टप्रति सबैको ध्यान गएको तर, उनको अमेरिकी साम्राज्यवाद र सीआईएसँगको संलग्नतातर्फ पनि सबैको ध्यानाकर्षण गराउँदै त्यो कुरा नेपालका लागि बढी घातक रहेको जनाएको छ ।
वक्तव्यमा भनिएको छ :
‘प्रधानमन्त्री प्रचण्डले चौतर्फी दबाबका बाबजुद रवि लामिछाने वा स्वतन्त्र पार्टीलाई गृहमन्त्रालय नदिनका लागि देखाएको दृढताका लागि हामीले धन्यवाद दिन चाहन्छौँ । त्यही क्रममा एमालेका नेता अध्यक्ष ओलीले सर्वोच्चको फैसलाको विरोधमा र रवि लामिछानेको पक्षमा जसरी वकालत गरे, त्यसले उनको राजनीतिक दिवालियापनलाई नाङ्गो प्रकारले प्रदर्शन गरेको छ । घटनाक्रमबाट रवि लामिछानेमा इमानदारिता नभएको कुरा त पहिले नै प्रष्ट भइसकेको थियो तर पत्रकार सम्मेलनको बेलामा उनले दिएका अभिव्यक्ति वा उनले प्रकट गरेको आक्रोशबाट उनको राजनीतिक स्तर पनि नभएको कुरा प्रष्ट भएको छ ।
रवि लामिछानको प्रश्न खालि उनीसम्म मात्र सीमित छैन, उनी जस्तो नेपालको नागरिक पनि नभएको व्यक्तिलाई उपप्रधानमन्त्री र गृहमन्त्री समेत किन बनाइयो ? त्यो प्रश्नको जवाफ वर्तमान सत्ता गठबन्धनले दिनुपर्ने छ वा इतिहासले उनीहरूसित त्यो प्रश्नको जवाफ माग्ने छ । प्रचण्डले अहिले उनलाई पुनः गृहमन्त्री बनाउन अस्वीकार गरेर त्यो गल्तीलाई केही सच्चाएका छन् तर ओली र अहिलेका सत्ता गठबन्धनका अन्य घटकले अहिले पनि रवि लामिछानेको पक्ष लिइरहेका छन् । त्यसले उनीहरूको देश, जनता र संविधान समेत प्रतिको गम्भीर गैर जिम्मेवारीपनलाई नै बताउँछ ।
यसका लागि हामीले नेपालका सञ्चारमाध्यमलाई धन्यवाद दिन चाहन्छौँ कि रवि लामिछाने प्रकरणमा उनीहरूले अत्यन्त सही दृष्टिकोण अपनाएका छन् । त्यस सन्दर्भमा उनले सञ्चार माध्यमहरूप्रति अन्यन्तै निम्नस्तरको गालीगलौजको भाषामा जुन आक्षेप लगाएका छन्, ती भ्रत्र्सना र निन्दायोग्य छन् । थाहा भएअनुसार कतिपय स्थानमा स्वतन्त्र पार्टीका कार्यकर्ताहरूले कतिपय समाचार पत्र जलाएर सञ्चार माध्यमप्रतिको आफ्नो आक्रोश पनि व्यक्त गर्ने गरेका छन् । त्यसरी उनीहरूले स्वयम् आफूलाई नै झन्पछि झन् उदों बनाउँदै लगिराखेका छन् ।
रवि लामिछानेको अवैध नागरिकता वा दोहोरो नागरिकताबारे धेरै कुरा उठेका छन् । त्यो कारणले उनी उपप्रधानमन्त्री र गृहमन्त्रीका साथै सांसदको पदबाट पनि हट्नुपरेको छ र त्यो कुरालाई हाम्रो पार्टीले स्वागत गरेको छ । अहिले उनको दोहोरो पासपोर्टबारे पनि कुरा उठेको छ र त्यसबारे छानबिन भइरहेको छ । त्यो छानबिनलाई प्रभावित गर्न उनले सांसद नभएको मान्छेले पनि गृहमन्त्री बन्न धेरै जोड गरेका थिए र ओलीले पनि त्यसका लागि धेरै शक्ति लगाएका थिए तर प्रचण्डले ओलीको त्यस प्रकारको दबाबमा नआएर अत्यन्त सही कार्य गरेका छन् र उनको त्यो कार्यले देशलाई ठुलो अनिष्टबाट बचाएको छ ।
देशमा रवि लामिछानेको अवैध नागरिकता र दोहोरो पासपोर्टबारे धेरै कुरा उठेका छन् । जे–जति कुरा उठेका छन्, ती सही पनि छन् तर आमजनता, राजनीतिक पार्टी र सञ्चार माध्यमको पनि एउटा महत्वपूर्ण पक्षप्रति ध्यान गएको पाइन्न । त्यो पक्ष के हो भने उनको अमेरिकी साम्राज्यवाद वा सिआइएसँगको संलग्नता । उनको कार्यविधिको प्रधानपक्ष त्यही हो । खालि हाम्रो पार्टीले मात्र एक्लै त्यो कुरा उठाएको छ । त्यसरी उनको समस्यालाई खाली अवैध नागरिकता र दोहोरो पासपोर्टको रूपमा मात्र बुझ्नु त्यसबाट सम्भावित वास्तविक राष्ट्रिय खतराप्रति आँखा चिम्लनु हुने छ । अमेरिकी साम्राज्यवादले नेपालको संसद र सरकारमा समेत आफ्नो प्रभुत्व कायम गर्ने रणनीतिअन्तर्गत नै नेपालमा स्वतन्त्र पार्टी गठन गरेको कुरा प्रष्ट छ । त्यसबाट देशलाई गम्भीर खतरा पुग्ने कुरा प्रष्ट छ र त्यसप्रति हामीले सम्पूर्ण देश र जनताको गम्भीर ध्यानाकर्षित गर्न चाहन्छौँ ।’
२०७९ माघ २४ गते ।
मोहनविक्रम सिंह
महामन्त्री
