काठमाडौं । मलेसियाका गृहमन्त्री सैफुद्दिन नासुसन इस्माइल नेपाली नेताहरुसँग छलफलमा व्यस्त छन् । बिहीबार साँझ काठमाडौं आइपुगेका उनले शुक्रबार विहानैदेखि नेपाली पक्षसँग छलफल थालेका हुन् ।
मलेसिया र नेपालबीच थप श्रमिक लैजाने र श्रमीकका समस्या समाधानको विषयमा छलफल भइरहेको हो । हालै ५ लाख आप्रवासी श्रमिक भित्र्याउने घोषणा गरेको मलेसियाले नेपालबाट के कसरी लैजान सकिन्छ भन्ने विषयमा सरकारसँग छलफल गरेको छ ।
मलेसियाका गृहमन्त्री र श्रम रोजगार तथा सामाजिक सुरक्षामन्त्री डोलप्रसाद अर्यालसहितको टोलीबीच शुक्रबार विहान १० बजे होटल सोल्टीमा छलफल सुरु भएको श्रम मन्त्रालयका सहसचिव डण्डुराज घिमिरे जानकारी दिए ।
काठमाडौं उत्रिएलगत्तै गृहमन्त्री सैफुद्दिनले आफ्नो एकमात्रै एजेण्डा श्रमिकको बारेमा छलफल गर्न नेपाल आएको बताएका थिए ।
मलेसियासँग नेपालले त्यहाँ रहेका श्रमिकको हक अधिकारका बारेमा कुरा उठाउने भएको छ। समान ज्याला, सामाजिक सुरक्षा, स्वास्थ्य उपचार लगायतका विषयमा गृहमन्त्री सैफुद्दिनसँग छलफल गर्ने एजेण्डा रहेको घिमिरेले बताए।
श्रम मन्त्रालयसँगको टोलीसँग छलफल गरेपछि आजै अपरान्ह प्रधानमन्त्री पुष्पकमल दाहाल प्रचण्डलाई भेट्ने कार्यतालिका रहेको छ। शनिबार गृहमन्त्रीसहितको टिम बंगलादेश प्रस्थान गर्नेछन् ।
