काठमाडौँ । राष्ट्रिय जनमोर्चाले रवि लामिछानेसम्बन्धी सर्वोच्चको फैसलाबाट नेपालको राष्ट्रियताको रक्षामा मदत पुग्ने दाबी गरेको छ ।
अध्यक्ष चित्रबहादुर केसीको हस्ताक्षरमा २०७९ माघ १३ गते शुक्रबार जारी वक्तव्यमा पार्टीको यस्तो अवधारणा व्यक्त भएको हो ।
वक्तव्यमा रविको पक्षमा पैरवी गर्ने प्रधानमन्त्री तथा मन्त्रिपरिषद्को कार्यालय, प्रतिनिधि सभा, गृह मन्त्रालय, निर्वाचन आयोग, काठमाडौँ जिल्ला प्रशासन कार्यालय र महान्यायाधिवक्ताको कार्याले पाठ सिक्नुपर्ने बताइएको छ ।
यस्तो छ, वक्तव्यको पूर्ण पाठ :
“रवि लामिछानेको नागरिकताको विषयमा सर्वोच्च अदालतद्वारा आज भएको फैसलालाई हाम्रो पार्टीले स्वागत गर्दछ ।
संविधान र कानुनको मूल्यलाई तिलाञ्जली दिएर प्रधानमन्त्री र मन्त्रिपरिषदको कार्यालय, प्रतिनिधि सभा, गृह मन्त्रालय, निर्वाचन आयोग, काठमाडौँ जिल्ला प्रशासन कार्यालय, महान्याधिवक्ताको कार्यालयलगायत राज्यसंयन्त्रको ठुलो शक्तिले रवि लामिछानेको पक्षमा पैरवी गरेका थिए तर सर्वोच्च अदालतले उनीहरूका ती सबै प्रयत्नलाई असफल बनाइदिएको छ ।
सर्वोच्चको यो फैसलाबाट संविधान र कानुनको साथै देशको राष्ट्रियताको रक्षाका लागि मदत पुग्नेमा हामीले आशा गरेका छौँ । सर्वोच्चको यो निर्णयबाट देशको पूरै राज्यसंयन्त्रले गम्भीर पाठ सिक्नुपर्ने आवश्यकता छ । संविधान, कानुन, देशको सार्वभौमिक स्वतन्त्रता र राष्ट्रियताको पक्षमा फैसला गरेकोमा हामीले सर्वोच्च अदालतका साथै सम्पूर्ण नेपाली जनतालाई बधाइ पनि दिन चाहन्छौँ ।”
