तानसेन । राष्ट्रिय जनमोर्चाका केन्द्रीय कार्यकारी अध्यक्ष रश्मीराज नेपालीले वाम–लोकतान्त्रिक गठबन्धन नेकपा (एमाले) का अध्यक्ष केपी शर्मा ओलीका कारण बनेको बताउनुभएको छ ।

राजमो समानुपातिक टोलीले पाल्पाको तानसेनमा २०७९ कात्तिक २४ गते आयोजना गरेको कोणसभामा प्रमुख अतिथिको आसनबाट मन्तव्य राख्दै उहाँले यस्तो अभिव्यक्ति दिनुभएको हो ।

‘वाम–लोकतान्त्रिक गठबन्धन रहरे बनेको होइन’ उहाँले अगाडि भन्नुभयो– ‘एमाले अध्यक्ष तथा तत्कालीन प्रधानमन्त्रीले पटक पटक जननिर्वाचित संसद् पटक पटक विघटन गरेर प्रतिगामी काम गरेकाले यो गठबन्धन बनेको हो ।’

अध्यक्ष नेपालीले ओलीले पटक पटक संस विघटन गरेर जनआन्दोलनका उपलब्धि समाप्त गर्न खोजेको दाबी गर्नुभयो ।

‘ओलीले आफ्नो महत्त्वाकाङ्क्षा र निरङ्कुश प्रवृत्तिका कारण नेपालको संविधानमाथि नै आक्रमण गर्न खोजे । त्यही भएर जनआन्दोलनका उपलब्धि लिपिबद्ध गरिएको नेपालको संविधानलाई जोगाउन पाँचदलीय वाम–लोकतान्त्रिक गठबन्धन बनाउनुपर्यो’ उहाँले भन्नुभयो ।

उहाँले तात्कालिक परिस्थितिमा सन्तुलित राजनीतिक अपनाएको राष्ट्रिय जनमोर्चालाई भोट दिन आम जनतालाई आग्रह गर्नुभयो ।
‘सङ्घीयताको विरोध, एमसिसी खारेजी, महङ्गी, भ्रष्टाचार, दण्डहीनताको अन्त्य तथा राष्ट्रियताको रक्षा गर्न राष्ट्रिय जनमोर्चालाई

समानुपातिकतर्फ भोट दिनुस्’ उहाँले भन्नुभयो– ‘प्रत्यक्षतर्फ वाम–लोकतान्त्रिक गठबन्धनका साझा उम्मेदवारलाई भोट दिनुस् ।’

कार्यक्रममा मन्तव्य राख्दै राजमो उपाध्यक्ष जनकराज शर्माले प्रतिगामी शक्तिहरूले गणतन्त्र र धर्म निरपेक्षताका साथै राष्ट्रियतामाथि पनि आँच पुर्याएकाले त्यसको रक्षाका लागि पाँचदलीय गठबन्धन बनेको बताउनुभयो ।

‘प्रतिगामी खतरा टड्कारो बनेकाले विभिन्न आपसी मतभेदका बाबजुद राष्ट्रिय जनमोर्चासहितको वाम–लोकतान्त्रिक गठबन्धन बनेको हो’ उहाँले भन्नुभयो– ‘त्यसकारण नेपाली जनताले समानुपातिकतर्फ राष्ट्रिय जनमोर्चालाई र प्रत्यक्षतर्फ गठबन्धनका साझा उम्मेदवारलाई मत दिनुपर्दछ ।’

त्यस्तै, राजमो केन्द्रीय सदस्य तारा थापाले पनि गणतन्त्र, राष्ट्रियता र धर्म निरपेक्षताको रक्षा तथा सङ्घीयताको खारेजीका लागि राजमो र वाम–लोकतान्त्रिक गठबन्धनलाई भोट दिन आग्रह गर्नुभयो ।

राजमो केन्द्रीय सदस्य तथा जनप्रतिनिधि सामेकुमार कार्कीले पनि सम्बोधन गर्नुभएको उक्त कार्यक्रममा अखिल नेपाल किसान महासङ्घ (अप्फा) का अध्यक्ष भैरवराज रेग्मी, लुम्बिनी प्रदेशसभातर्फ राजमोकी समानुपातिक उम्मेदवार नरमति सिँजाली, अखिल नेपाल महिला सङ्घकी केन्द्रीय सदस्य उमा सिँजाली र स्थानीय जनप्रतिनिधि लालबहादुर खातीको समेत आतिथ्य रहेको थियो ।

कार्यक्रम राजमो तानसेन–११ वडासमितिका वासुवेदव बोहराको अध्यक्षता तथा राजमो पाल्पाका अध्यक्ष विशाल दर्लामीको सञ्चालनका साथै सम्पन्न भएको थियो ।

समानुपातिक टोली पाल्पाबाट गुल्मीको सदरमुकाम तमघास जाँदै छ । टोलीले त्यहाँ कार्यक्रम गरेर गुल्मी कालिगण्डकी गाउँपालिकाको पुर्तिबाटमा बास बस्न जाने छ ।