महेन्द्रनगर । नेपालको कालापानी लगायतका क्षेत्र समेटर भारतले जारी गरेको नयाँ नक्सा खारेजीको माग गर्दै महेन्द्रनगरमा भएको प्रदर्शनका क्रममा प्रहरीले हस्तक्षेप गरेको भन्दै अखिल (छैठौँ) कञ्चनपुरले विरोध गरेको छ ।

शुक्रबार महेन्द्रनगरमा भारतीय प्रधानमन्त्री नरेन्द्र मोदीको पुत्ला दहनका क्रममा प्रहरीले जल्दै गरेको पुत्ला विद्यार्थीहरुमाथि फाल्दा अखिल (छैठौं) का महासचिव महेशराज जोशी घाइते भएको शनिबार जारी विज्ञप्तिमा जनाईको छ । घाइते जोशीको महाकाली अञ्चल अस्पतालमा उपचार गरिएको छ ।

अखिल (छैठौं) कञ्चनपुरमा अध्यक्ष महेश भट्ट र सचिव पुष्कर भट्टद्वारा संयुक्त रुपमा जारी वक्तव्यमा प्रहरी दमनको भत्र्सना गरिएको छ ।
भारतले जारी गरेको नयाँ नक्सामा नेपालको कालापानी क्षेत्रलाई समेत भारतीय भूभागकै रुपमा आफ्नो नक्शामा समावेश गरेको बिरोधमा देशभर प्रदर्शन भएको छ ।