काठमाडौं । रौतहटमा बम विस्फोटबाट घाइतेलाई इँट्टाभट्टामा हालेर हत्या गरेको आरोप लागेका सांसद मोहम्मद अफ्ताव आलममाथिको थुनछेक बहस आजदेखि सुरु हुँदैछ । मंगलबार बयानका लागि अदालत हाजिर गरिएका आलमको बयान नसकिएपछि बुधबार पुनः हाजिर गराउने गरी उनलाई प्रहरी हिरासतमा पठाइएको थियो । जिल्ला अदालत स्रोतका अनुसार उनीमाथिको थुनछेक बहस आजबाट सुरु हुँदैछ ।
आलम विरुद्ध रौतहट जिल्ला अदालतमा कर्तब्य ज्यान, ज्यान मार्ने उद्योग र बम बिस्फोटको मुद्दा दर्ता गरिएको छ । न्यायाधीश दीपक ढकालको इजलासमा आलमको बयान लिखत् भएको थियो । अदालत प्रशासनका अनुसार आलमलाईउपलब्ध सबुत प्रमाणका आधारमा घटनाका बिषयमा प्रश्न सोधिएको थियो ।
२०६४ साल चैत्र २७ गते बुधबार रौतहटको राजपुर फरहदवामा भएको विस्फोटमा घाइते भएका नारायणसिंह राजपुतको छोरा वर्ष पिन्टु भनिने त्रिलोक प्रताप सिंह तथा रुक्साना खातुनको छोरा वसी अख्तरसहितलाई इँटाभट्टामा हालेर हत्या गरिएको थियो ।
सो घटनामा मोहम्मद अफताव आलमसहित मोहम्मद महताब आलम, मोहम्मद मोविन आलम, शेख भदई, शेख सेराज, शेख जुमईन भन्ने शेख मलकार, गौरीशंकर साह, बद्री सहनी, मुक्ति साह, शेख फजलेह र सगिर आलमलाई मुख्य अभियुक्त कायम गरिएको छ।
सोमबार जिल्ला सरकारी वकिल कार्यालयले तीन अभियोगमा हदैसम्मको सजाय मागदाबी गर्दै मुद्दा दर्ता गरेको हो।
