काठमाडौं । अखिल नेपाल युवक संघले भारतले कालापानी क्षेत्रसमेत समेटेर बनाएको नक्साप्रति आपत्ति जनाएको छ । बुधबार विज्ञप्ति प्रकासित गरी युवक संघले भारतीय साम्राज्यवादी हर्कतको निन्दा गरेको छ ।

अध्यक्ष अनिलकिशोर घिमिरेद्वारा जारी विज्ञप्तिमा भारतले तयार पारेको नक्साबारे सरकारलाई तत्काल आधिकारिक धारणा सार्वजनिक गर्न र यसको कडा विरोध गर्न माग गरिएको छ ।

यस्तो छ विज्ञप्ति
भारतको गृहमन्त्रालयले तयार गरेको भारतको नयाँ राजनीतिक नक्सामा नेपालको लिम्पियाधुरा (कालापानी र लिपुलेक क्षेत्रसमेत) भारतीय क्षेत्रमा राखिएको सम्बन्धमा कार्तिक १८ गते प्रकाशित समाचारप्रति हाम्रो गम्भीर ध्यानाकर्षण भएको छ ।

यसको बास्तबिकता बारे तत्काल आधिकारिक धारणा सार्वजनिक गर्न हामीले नेपाल सरकारसँग जोडदार माग गर्दछौं र भारतको यस्तो साम्राज्यबादि हर्कतको विरोध र निन्दा गर्दछौं ।

अहिलेसम्म नेपालको नापी विभागले तयार गरेको नक्सामा लिम्पियाधुरा (कालापानी र लिपुलेक क्षेत्रसमेत) नेपालभित्र परेको र यो नक्सा हामीले प्रयोग गर्दै आएका छौँ । नेपालका तत्कालीन प्रधानमन्त्री मातृकाप्रसाद कोइरालाले सन् १९५२ मा काठमाडौँ र उत्तरी सीमा नाकाहरूमा भारतीय सेना राख्न अनुमति दिएका थिए । नेपाली जनताको निरन्तर विरोधपछि सन् १९६९ मा भारतीय सेना फिर्ता पठाइएको थियो तर नेपालको कालापानीबाट भारतीय सेना हटेनन्, यथावत छन् ।

यही अवस्थामा भारत सरकारले नेपालको भूमि लिम्पियाधुरा (कालापानी र लिपुलेकसमेत) आफ्नो क्षेत्रमा राखेर नक्सा तयार पार्नु नेपाली सार्वभौमिकता माथिको गम्भीर हस्तक्षेप हो । यसैले भारतले तयार गरेको नयाँ नक्साबारे नेपाल सरकारको आधिकारिक धारणा तत्काल सार्वजनिक गर्न र यसको कडा विरोध गर्न अखिल नेपाल युवक संघ माग गर्दछ।