चण्डीगढ, भारत । हिमाचल प्रदेशको हरौलीस्थित ‘मित्रा दा ढाबा’मा कार्यरत नेपाली युवक केशव थापाको शङ्कास्पद अवस्थामा मृत्यु भएको छ। घटनामा संलग्न रहेको आरोपमा प्रहरीले ढाबा सञ्चालक मुकेश कुमार र सञ्जीव कुमारलाई पक्राउ गरेको छ।
करिब ४० वर्षीय थापा सेप्टेम्बर २२ मा पञ्जाब–हिमाचल प्रदेश सीमास्थित अयोली मोडमा बेहोस अवस्थामा फेला परेका थिए। उनलाई तत्काल नङ्गलस्थित सरकारी अस्पताल लगिए पनि अवस्था गम्भीर भएपछि चण्डीगढस्थित पीजीआईमा थप उपचारका लागि पठाइएको थियो। उपचारकै क्रममा सेप्टेम्बर २४ मा उनको मृत्यु भएको हो।
मृतकका भाइ अमित थापाका अनुसार केशवको हात, खुट्टा, टाउको, अनुहार र घाँटीमा चोटका निशानहरू भेटिएका छन्। परिवारले ढाबा सञ्चालकले उनलाई समयमा पारिश्रमिक नदिने तथा गालीगलौज र कुटपिट गर्ने गरेको आरोप लगाएको छ।
परिवारको बयान र प्रारम्भिक अनुसन्धानका आधारमा प्रहरीले दुवै जनालाई पक्राउ गरी ढाबा सिल गरेको जनाएको छ। घटनाबारे थप अनुसन्धान भइरहेको प्रहरीले जनाएको छ।
सेप्टेम्बर २५ मा चण्डीगढमा पोस्टमार्टमपछि थापाको शव परिवारलाई हस्तान्तरण गरिएको थियो। त्यसको भोलिपल्ट सेप्टेम्बर २६ मा परिवार, आफन्त तथा मूल प्रवाहका नेता–कार्यकर्ताको उपस्थितिमा उनको दाहसंस्कार गरिएको थियो।
