काठमाडौं । नेकपा (मसाल) का महामन्त्री मोहनविक्रम सिंहले पार्टीमा नयाँ पुस्ता भर्ती गर्न जोड दिनुपर्ने बताउनुभएको छ ।
शनिबार (२६ साउन) काठमाडौंको कपनस्थित राष्ट्रिय जनमोर्चाको केन्द्रीय कार्यालयमा आयोजित राजमो प्युठान–काठमाडौं सम्पर्क समितिको बैठकलाई सम्बोधन गर्दै महामन्त्री सिंहले यस्तो बताउनुभएको हो ।
‘सम्पर्क समितिले सम्बन्धित जिल्लाबाट आएर काठमाडौं बसेका व्यक्तिहरूसँगको घेटघाटलाई निरन्तरता दिनुपर्छ । यसले पार्टीलाई अगाडि बढाउन मद्दत गर्छ’ महामन्त्री सिंहले भन्नुभयो, ‘पार्टीमा नयाँ पुस्ता, युवा–विद्यार्थीलाई भर्ती गर्न जोड दिन आवश्यक छ ।’
सिंहले पार्टीको संगठनलाई मजबुत बनाउन जनतासँगको सम्बन्धलाई जीवन्त राख्न पनि कार्यकर्तासँग आग्रह गर्नुभयो ।
फरक प्रशंगमा महामन्त्री सिंहले देशमा वैदेशिक हस्तक्षेप बढ्दै गएको उल्लेख गर्दै जनता सचेत हुनुपर्ने बताउनुभयो ।
राष्ट्रिय जनमोर्चा प्युठान–काठमाडौं सम्पर्क समितिका अध्यक्ष अधिवक्ता पदम रोकाको अध्यक्षतामा भएको कार्यक्रममा प्युठानबाट काठमाडौं आएर विभिन्न पेशा व्यवसाय गरेर बसेका व्यक्तिहरूसँग सम्पर्क अघि बढाउनेबारे छलफल भएको थियो ।
बैठकले प्युठानका नौवटै पालिकाबाट काठमाडौं आएर बसेका व्यक्तिहरूको तथ्यांक संकलन गर्ने र सबै पालिकाबाट प्रतिनिधित्व हुने गरी आगामी दसैँ–तिहारको बिचमा भेला राख्ने निर्णय गरेको सचिव विवेक जिसीले जानकारी दिनुभयो ।
