बुटवल । अखिल नेपाल जनजाति सम्मेलनले तिसौँ विश्व आदिवासी दिवस मनाएको छ ।

२०८१ साउन २५ गते शुक्रबार (अगस्त ९) का दिन देशभर विश्व आदिवासी दिवस मनाइरहँदा जनजाति सम्मेलन लुम्बिनी प्रदेश समितिले सो दिवस मनाएको हो ।

कार्यक्रममा बोल्दै जनजाति सम्मेलनका केन्द्रीय उपाध्यक्ष रमेशमान गुरुङले आदिवासी जनजातिलाई जातीय राजनीतिबाट अलग गराउनुपर्ने आवश्यकतामा जोड दिनुभयो ।

आदिवासी जनजातिलाई स्थानीय स्वशासनको व्यवस्था गरेर अधिकारमुखी बनाउनुपर्नेमा जोड दिँदै उहाँले भन्नुभयो– ‘अधिकार पाउनबाट वञ्चित भएका आदिवासी जनजातिको नाममा जातीय राजनीति गर्नेका कारण आदिवासी जनजाति आन्दोलन ओझेलमा परेको छ ।’

आदिवासी र जनजातिको परिभाषा अलग भएको बताउँंदै अखिल नेपाल जनजाति सम्मेलनले मात्रै आदिवासी जनजातिको आन्दोलन सही प्रकारले अगाडी बढाएको दाबी उहाँले गर्नुभयो ।

कार्यक्रममा बोल्ने अन्य वक्ताहरूले आदिवासी जनजाति आन्दोलनलाई साम्राज्यवादी र देशीय शक्तिकेन्द्रले जातीयताको नारा दिएर गलत ढङ्गले प्रयोग गरेको बताउनुभयो ।

एनजिओ/आइएनजिओ चलाउनेहरूले आदिवासी जनजातिको नाममा डलरको खेती गरेर आदिवासी आन्दोलनलाई विभाजित गरेर बदनाम गरेको आरोपसमेत उहाँहरूले लगाउनुभयो ।

जातिवादी बन्न नहुने बताउँदै उनीहरूले आदिवासी जनजातिको आन्दोलनलाई वर्गीय आन्दोलनसँग जोडेर आदिवासीलाई अधिकार दिनुपर्ने बताउनुभयो ।

वामपन्थी नेता सुरेश थापाले आदिवासी जनजाति आन्दोलनलाई जातीय आन्दोलनसँग जोड्नु गलत भएको बताउनुभयो ।

उहाँले भन्नुभयो– ‘कम्युनिस्ट पार्टीको वर्गीय आन्दोलनसँग आदिवासी जनजाति आन्दोलनलाई जोड्नुपर्दछ ।’

आदिवासी जनजातिलाई जातीय राज्य र जातिवादसँग जोडर सम्पत्ति कमाउनेसँग सचेत रहन उहाँले आग्रह गर्नुभयो ।

जातीय सङ्घीयताले समस्या निम्त्याएको बताउँंदै उहाँले साम्राज्यवादी तथा विदेशी शक्तिकेन्द्रसँग मिलेर आदिवासी जनजाति आन्दोलन भाड्ने काम भएको आरोप उहाँले लगाउनुभयो ।

कार्यक्रममा रक्तिम सांस्कृतिक अभियानका अध्यक्ष गिरीप्रसाद बुढा, प्रगतिशील पत्रकार सङ्घका अध्यक्ष श्यामलाल पोखरेल, अखिल नेपाल राष्ट्रिय उद्योग व्यापार सङ्घका अध्यक्ष ढुण्डिराज शर्मा, अखिल नेपाल किसान महासङ्घ (अप्फा) का केन्द्रीय सदस्य रुकबहादुर पराजुली, नेकपा (मसाल) रुपन्देही प्रवक्ता लालचन्द पन्त, जनजाति सम्मेलन रुपन्देहीका अध्यक्ष नारायण पुन, अखिल नेपाल युवक सङ्घ रुपन्देहीका अध्यक्ष मिलन पोखरेल, राजमो नेताहरू नरेन्द्रराज श्रीनेत, दिलप्रसाद नेपाली, नरबहादुर घर्तीमगर, केयरसिंह पुनलगायतले पन्तव्य राख्नुभएको थियो ।

जनजाति सम्मेलनकी केन्द्रीय सचिव तथा लुम्बिनी प्रदेश अध्यक्ष उषा पुनमगरको अध्यक्षतामा उक्त कार्यक्रम सम्पन्न भएको थियो ।