तानसेन । पाल्पाका सात क्रियाशील राजनीतिक दलहरूले प्रधानमन्त्रीको नाममा सात बुँदे ज्ञापनपत्र बुझाएका छन् ।
२०८१ साउन १३ गते आइतबार प्रमुख जिल्ला अधिकारीमार्फत उनीहरूले सो ज्ञापन बुझाएका हुन् ।
ज्ञापनपत्रमा राष्ट्रिय जनमोर्चाका जिल्ला अध्यक्ष विशाल दर्लामी, नेकपा (माओवादी केन्द्र) का राजेन्द्र विक, राष्ट्रिय स्वतन्त्र पार्टीका जीवन पाण्डे, राष्ट्रिय प्रजातन्त्र पार्टीका डुलबहादुर कुँवर, नेकपा (एकीकृत समाजवादी) का अशोककुमार शाही, नेपाल कम्युनिस्ट पार्टीका मीनबहादुर सी र राष्ट्रिय जनमुक्ति पार्टीका होमबहादुर थापाको हस्ताक्षर रहेको छ ।
ज्ञापनपत्रमा यदि द्विदलीय शासन प्रणालीको परिकल्पना गरिएको हो भने त्यो अलोकतान्त्रिक हुने धारणा व्यक्त गर्दै यस्तो प्रयासको घोर भर्त्सना गरिएको छ ।
एवम् प्रकारले ज्ञापनमा नक्कली भुटानी शरणार्थी प्रकरणलगायत सबै भ्रष्टाचारका फाइल खोली दोषीलाई कारबाही गरिनुपर्ने, राज्यलाई तिर्न बाँकी रहेको अर्बौं विद्युत् वक्यौता असुल गरिनुपर्ने, सिमलताल दुर्घटना, सौर्य एयरलाइन्स विमान दुर्घटना र देशभरिका प्राकृतिक विपत्तिमा परेका पीडितको खोजीकार्य र उद्धार गरिनुपर्ने माग र राखिएको छ ।
त्यस्तै, दलीय भागवण्डा वा नियुक्तिप्रति सचेत हुनुपर्ने, वर्षाको कारण देखाई उपभोग्य वस्तुको अभाव, मूल्यवृद्धि तथा कृत्रिम अभाव रोक्नुपर्ने र देशभरिका सामाजिक, शैक्षिक, धार्मिक र व्यावसायिक सङ्घसंस्थाको राजनीतिकरण रोकिनुपर्ने माग पनि राखिएको छ ।
