काठमाडौं । गएको शुक्रबार त्रिशूलीमा हराइरहेका दुईवटा बसका थप एक यात्रुको शव फेला परेको छ।
बिहीबार भरतपुर महानगरपालिका २६ शिशुवार क्षेत्रमा नारायणी नदीको किनारमा एक पुरुषको शव फेला परेको चितवन प्रहरीले जनाएको छ।
शवको सनाखत हुन बाँकी रहेको जिल्ला प्रहरी कार्यालय चितवनका प्रवक्ता डीएसपी भेषराज रिजालले जानकारी दिए। शव पोष्टमार्टमका लागि भरतपुर अस्पताल ल्याइएको उनले बताए।
यससँगै फेला परेको शवको संख्या २० पुगेको छ।
काठमाडौँबाट गौरतर्फ गइरहेको बागमती प्रदेश०३–००१ख २४९५ नम्बरको बस र वीरगञ्जबाट काठमाडौँतर्फ गइरहेको बागमती प्रदेश०३–००६ख १५१६ नम्बरको बस गत शुक्रबार बिहानपख भरतपुर महानगरपालिका–२९ सिमलतालको पहिरोले बगाएर त्रिशूली नदीमा बेपत्ता भएका थिए।
ती दुवै बसमा ६५ जना रहेकोमा तीनजना हामफालेर बाँच्न सफल भएका थिए भने ६२ जना बेपत्ता थिए । २० वटा शव फेला परेपनि अझै ४२ जना बेपत्ता छन् । हालसम्म दुईवटै बस भेटिएका छैनन्।
