काठमाडौँ । राष्ट्रिय जनमोर्चाका अध्यक्ष तथा प्रतिनिधि सभाका सांसद चित्रबहादुर केसीले सत्तासिन दलहरूको भ्रष्ट चरित्रबाट लोकतन्त्र नजोगिने प्रष्ट पार्नुभएको छ ।

२०८१ असार २८ गते शुक्रबार प्रधानमन्त्री पुष्पकमल दाहालको विश्वासमतको विपक्षमा मन्तव्य राख्दै उहाँले यस्तो बताउनुभएको हो ।

सम्बोधनको क्रममा उहाँले राजनीतिक क्षेत्रमा देखा परेको विकृति, विसङ्गतिको खरो शब्दमा आलोचना गर्नुभयो ।

‘हामीले राजनीति गरेको विशुद्ध कमाउनका लागि हो ?’ उहाँले भन्नुभयो– ‘अहिलेको हाम्रो यस्तो भ्रष्ट चरित्रले गणतन्त्रको रक्षा हुन सक्दैन । राष्ट्रियताको रक्षा पनि हुन्न ।’

अध्यक्ष केसीले राष्ट्रिय जनमोर्चाले कुनै राजनीतिक दलप्रति आग्रह–पूर्वाग्रह राखेर समर्थन वा विरोध नगर्ने पनि स्पष्ट पार्नुभयो ।
‘जसले राम्रो काम गर्दछ, त्यसलाई हामीले समर्थन गर्छौं, जसले गलत काम गर्छ, त्यो पार्टीसित सम्बन्ध बिग्रन्छ भनेर चुप लागेर पनि बस्दैनौँ’ उहाँले भन्नुभयो ।

२०७२ सालमा देशमा भूकम्प र भारतीय नाकाबन्दीको स्मरण गर्दै उहाँले एमालेसित आफ्नो कुनै पूर्वाग्रह नरहेको पनि प्रष्ट्याउनुभयो ।

‘मलाई उपप्रधानमन्त्री बनाएको एमालेले नै हो नि’ उहाँले भन्नुभयो– ‘तर एमालेले गलत काम गरेपछि हामीले त्यसको पनि विरोध ग¥यौँ ।’

उहाँले पहिले प्रधानमन्त्री दाहाल बालकोट पुगेर सरकार बनाउँदा काङ्ग्रेसले समेत समर्थन गरेको प्रसङ्ग जोड्दै उहाँले भन्नुभयो– ‘उति बेला जम्मै पार्टी एकातिर हुँदा पनि हामी एक्लै प्रतिपक्षमा उभिएका थियौँ भने अहिले दुई ठुला दल मिलेर सरकार बनाउँदा पनि हामीले समर्थन गर्दैनौँ र यो विश्वासमतको प्रस्तावप्रति पनि हाम्रो समर्थन छैन ।’

त्यस्तै, संविधान संशोधनको सन्दर्भमा उहाँले आधारभूत विषयमा संशोधन गर्न नहुने तर सङ्घीयता जस्तो विषयलाई हटाउन भने संशोधन गर्न सकिने आसय व्यक्त गर्नुभयो ।

‘संविधान संशोधन नै गर्न नसकिने दस्तावेज हो भन्ने कुरा होइन’ उहाँले भन्नुभयो– ‘संविधान संशोधन गर्न सकिन्छ तर आधारभूत विषयमा संशोधन गर्न पाइँदैन बरु देशलाई बोझ भएको व्यवस्था (सङ्घीयता) लाई हटाउने गरी संविधान संशोधन गरिनुपर्दछ ।’