नेपालगञ्ज । सहिद टोपबहादुर कार्कीको तेइसौँ स्मृतिदिवस दिवस सम्पन्न भएको छ ।
राष्ट्रिय जनमोर्चा बाँकेको आयोजनामा २०८२ पुस २९ गते सो कार्यक्रम कार्कीको निवास कोहलपुरमा सम्पन्न भएको हो ।
सहिदपत्नी पार्वती कार्कीको प्रमुख आतिथ्यमा अघि बढेको सो कार्यक्रममा उहाँसँगै अखिल नेपाल किसान महासङ्घ (अप्फा) का महासचिव तुलसिराम सापकोटा, अखिल नेपाल युवक सङ्घका केन्द्रीय सल्लाहकार कृष्णराज पाण्डे र अखिल नेपाल महिला सङ्घकी केन्द्रीय सदस्य पूर्णकला भण्डारीले मन्तव्य राख्नुभएको थियो ।
कार्यक्रममा किसान नेता तिलकराम पौडेल, सहिद कार्कीकी छोरी सावित्री काकी र बहिनी भीमा कार्कीको पनि आतिथ्य रहेको थियो ।
राजमो बर्दियाका अध्यक्ष लोकबहादुर रानामगरको सञ्चालन तथा जगदीश ढकालको अध्यक्षतामा अघि बढेको उक्त कार्यक्रममा सहिद कार्कीको सम्मानमा एक मिनट मौनधारणसँगै उहाँको फोटोमा टिका र माल्र्यापण गरिएको थियो ।
पृष्ठभूमि
सहिद कार्कीको २०५९ पुस ३० गते तत्कालीन शाही सेनाले हत्या गरेको थियो । त्यति बेला सेनाले उहाँका बुबा भोजबहादुरको पनि गोली हानी निर्मम हत्या गरेको थियो । बर्दियाको राजापुरस्थित मानपुर टपरामा घरबाट दुबै बाबुछोरालाई अपहरण शैलीमा लतार्दै निकालेर सेनाले नजिकैको तोरीबारीमा पुर्याएर गोली हानेर उहाँहरूको हत्या गरेको थियो ।
नेपाली सेनामा कार्यरत उहाँका छिमेकी हरिराम चौधरीले जग्गाको सीमाविवादका कारण माओवादीको आरोप लगाएर कार्कीको हत्या गराएका थिए ।
कार्कीको हत्यापछि राजमोले देशव्यापी विरोध गरेपछि सेनाले घटनाको छानबिन गरी गोली हान्न आदेश दिने कमान्डरसहित घटनामा संलग्नलाई आन्तरिक कारबाही गरेको थियो । शाहीकालमा सेनाले गोली चलाएको घटनामा आफ्ना कमान्डर विरुद्ध कोर्टमार्सल गरेको त्यो पहिलो घटना थियो ।
राजमोले त्यति बेलै कार्कीलाई सहिद घोषणा गरेको थियो । सहादत प्राप्त गर्ने बेलामा सहिद कार्की तत्कालीन जनमोर्चा नेपाल बर्दियाको सदस्य, अखिल नेपाल जनवादी युवा सङ्घ बर्दियाका सचिव र भेरीकर्णाली क्षेत्रीय समितिको सदस्य जस्ता जिम्मेवारीमा सक्रिय हुनुहुन्थ्यो ।
सहिद कार्कीको परिवार निरन्तर राजमोमा संलग्न रही राजनीतिप्रति क्रियाशील रहेको अवस्था छ ।
