काठमाडौं । राष्ट्रिय जनमोर्चाले सञ्चालन गरेको पार्टी स्कुलमा नयाँ सेसनको कक्षा सुरु भएको छ ।
बिहीबार (२०८१ साउन ११) देखि नयाँ कक्षा सुरु भएको हो ।
राष्ट्रिय जनमोर्चाको केन्द्रीय कार्यालय कपनमा आयोजित एक कार्यक्रमबीच नेकपा (मसाल) का महामन्त्री मोहनविक्रम सिंहले प्रशिक्षण कार्यक्रमको उद्घाटन गर्नुभयो ।
त्यस अवसरमा बोल्दै महामन्त्री सिंहले प्रशिक्षणबाट सिकेका कुरा देश जनताको हितका पक्षमा लागू गर्न प्रशिक्षार्थीहरूसँग आग्रह गर्नुभयो
कार्यक्रमममा शुभकामना मन्तव्य दिँदै राष्ट्रिय जनमोर्चाका अध्यक्ष चित्रबहादुर केसीले आफ्नो पार्टीले लामो समयदेखि यस खालका प्रशिक्षण सञ्चालन गरिरहेको स्मरण गर्दै प्रशिक्षणले नेता कार्याकर्तामा क्षमता वृद्धि गर्ने विश्वास व्यक्त गर्नुभयो ।
पार्टी स्कुलका प्रमुख प्रशिक्षक दुर्गानाथ खरेलको अध्यक्षतामा सम्पन्न उद्घाटन समारोहको सञ्चालन नेकपा (मसाल) का प्रवक्ता रामप्रकाश पुरीले गर्नुभएको थियो ।
कार्यक्रममा राजमो नेता आनन्द शर्माको पनि आतिथ्यता रहेको थियो ।
देशभरका ४० जना प्रशिक्षार्थी रहेको प्रशिक्षण कक्षा १५ दिनसम्म सञ्चालन हुनेछ । कार्यक्रममा दर्शन, अर्थशास्त्र, समाजवाद, राजनीति, संगठन, सीमासम्बन्धी, जलस्रोत, राज्यको पुनर्संरचना अन्तर्राष्ट्रिय राजनीति लगायतका विवषयमा प्रशिक्षण दिइने प्रशिक्षक दुर्गानाथ खरेलले जानकारी दिनुभयो ।
राष्ट्रिय जनमोर्चाले २०६५ सालदेखि सञ्चालन गरेको पार्टी स्कुलमा हालसम्म १९ वटा सेसन सम्पन्न भइसकेका छन् भने झण्डै ४५० नेता, कार्यकर्ताले प्रशिक्षण लिइसकेका छन् ।
